ডিজিটেল ডেস্কঃ বাঢ়িছে চৰকাৰৰ ঋণ বোজা। যদি এনেদৰে ঋণ বৃদ্ধি পাই থাকে তেন্তে ই দেশৰ মুঠ ঘৰুৱা উৎপাদন (জিডিপি)কো আগুৰি ধৰিব পাৰে।আন্তঃৰাষ্ট্ৰীয় মুদ্ৰা নিধিৰ প্ৰতিবেদনত প্ৰকাশ পাইছে এনে তথ্য।সংবাদ মাধ্যমৰ ‘বিজনেছ ষ্টেণ্ডাৰ্ড’ৰ এক প্ৰতিবেদন অনুসৰি আই এম এফে ভাৰতক সকীয়াই দিছে যে ভাৰত চৰকাৰৰ ঋণ দেশৰ জিডিপি অৰ্থাৎ ৩.১৮ লাখ কোটি টকাতকৈও অধিক হ’ব পাৰে।
প্ৰতিবেদন অনুসৰি যদি এনেকুৱা হয় তেন্তে ভাৰতৰ অৰ্থনৈতিক অৱস্থা যথেষ্ট প্ৰতিকূল হৈ পৰিব পাৰে। কাৰণ, জলবায়ু আৰু প্ৰাকৃতিক দুৰ্যোগৰ উন্নতি সাধনৰ বাবে ভাৰতক এতিয়া বহুত টকাৰ প্ৰয়োজন। আৰু সেয়েহে চৰকাৰী ঋণ যদি জিডিপিতকৈ বেছি হয় তেন্তে অৰ্থনীতিৰ প্ৰতি বিপদ কঢ়িয়াই আনিব পাৰে।
আই এম এফে এক বাৰ্ষিক প্ৰতিবেদনত লিখিছে, ‘দীৰ্ঘম্যাদী বিপদৰ প্ৰতি লক্ষ্য ৰাখি ভাৰতক জলবায়ু পৰিৱৰ্তনৰ লক্ষ্য পূৰণৰ বাবে আৰু জলবায়ু আৰু প্ৰাকৃতিক দুৰ্যোগৰ পৰিস্থিতি উন্নত কৰিবলৈ এতিয়া বহু ধনৰ প্ৰয়োজন। ইয়াৰ উপৰিও বৃহত্তৰ ব্যক্তিগত খণ্ডতো বিনিয়োগৰ প্ৰয়োজন আছে।’
আই এম এফে চুক্তিবদ্ধ সদস্য দেশসমূহৰ বিত্তীয় বিষয়সমূহ চাই এই প্ৰতিবেদন প্ৰকাশ কৰিছে।কিন্তু ভাৰতৰ নৰেন্দ্ৰ মোদী চৰকাৰে আইএমএফৰ এই প্ৰতিবেদনৰ সৈতে মতানৈক্য প্ৰকাশ কৰিছে।
আই এম এফৰ ভাৰতৰ কাৰ্যবাহী সঞ্চালক কে ভি সুব্ৰমণিয়াময়ে আই এম এফৰ অনুমানৰ সৈতে একমত নহয়। তেওঁ দাবী কৰে যে ভাৰতৰ ‘ঋণ-জিডিপি’ অনুপাত (এখন দেশৰ ঋণ আৰু জিডিপিৰ অনুপাত) অতি কম পৰিমাণেহে বৃদ্ধি পাইছে।
সুব্ৰমণিয়ামে কয় যে, ‘দীৰ্ঘম্যাদী ঋণৰ আশংকা অধিক। কিন্তু ভাৰতৰ সাৰ্বভৌম ঋণৰ আশংকা অতি কম কাৰণ ই মূলতঃ স্থানীয় মুদ্ৰাত মূল্যৰ। যোৱা দুটা দশকত বিশ্ব অৰ্থনীতি বহু বিপদৰ সন্মুখীন হোৱাৰ পাছতো ভাৰতৰ ৰাজহুৱা ঋণ-জিডিপি অনুপাত ২০০৫-০৬ চনত ৮১ শতাংশৰ পৰা ২০২১-২২ চনত ৮৪ শতাংশলৈ বৃদ্ধি পাইছে। কিন্তু ২০২২-২৩ বিত্তীয় বৰ্ষত পুনৰ ৮১ শতাংশলৈ হ্ৰাস পায়।’
প্ৰতিবেদনত আই এম এফে ভাৰতৰ বিনিময় হাৰৰ শাসন ব্যৱস্থা ‘স্থিৰ’ অৱস্থাত থকা বুলিও উল্লেখ কৰিছে। কিন্তু ভাৰতে বিনিময় হাৰৰ নমনীয়তাৰ গুৰুত্বৰ ওপৰত গুৰুত্ব আৰোপ কৰি আই এম এফৰ এই দাবীক বিতৰ্ক কৰিছে।
ৰাষ্ট্ৰীয় সংবাদ মাধ্যমৰ বাতৰি অনুসৰি আইএমএফে বাৰ্ষিক প্ৰতিবেদনত ভাৰতীয় অৰ্থনীতিৰ প্ৰতিও আশাপ্ৰদ ফলাফল দেখুৱাইছে। প্ৰতিবেদনত উল্লেখ কৰা হৈছে যে যদি ভাৰত চৰকাৰে অৰ্থনীতিৰ কিছু গাঁথনিগত পৰিৱৰ্তন কৰে তেন্তে চলিত আৰু অহা বিত্তীয় বৰ্ষত অৰ্থনৈতিক উন্নতিৰ সম্ভাৱনা আছে।এক বিবৃতিত আইএমএফে লগতে কয় যে ভাৰতে ঋণ হ্ৰাস কৰিবলৈ মাজে মাজে ৰাজহ সংগ্ৰহৰ ক্ষেত্ৰত “অভিলাষী” হোৱাটো প্ৰয়োজন।
লগতে এক বিবৃতিত আই এম এফে কয়, ‘গোলকীয় মন্দাৱস্থাই আগন্তুক বিত্তীয় বৰ্ষত বাণিজ্য আৰু অৰ্থনীতিৰ জৰিয়তে ভাৰতত প্ৰভাৱ পেলোৱাৰ সম্ভাৱনা আছে। বিশ্বব্যাপী যোগানৰ ব্যাঘাতৰ ফলত সামগ্ৰীৰ মূল্যৰ উঠা-নমা হ’ব পাৰে। ফলত এই পৰিস্থিতিত ভাৰতৰ অৰ্থনীতিৰ ওপৰত হেঁচা পৰিব পাৰে।’
ভাৰতৰ ৰিজাৰ্ভ বেংকৰ প্ৰাক্তন গৱৰ্ণৰ ডি চুব্বাৰায়ো ভাৰতৰ ঋণ-জিডিপি অনুপাতক লৈ উদ্বেগ প্ৰকাশ কৰে। সংবাদ মাধ্যমৰ সৈতে কথা পাতি তেওঁ কয় যে চৰকাৰে ঋণৰ পৰিমাণ হ্ৰাস কৰিব লাগে। অন্যথা ই বিদেশী বিনিয়োগকাৰীৰ বাবে চিন্তাৰ কাৰণ হৈ পৰিব পাৰে। আনকি বহু বিনিয়োগকাৰীয়েও ভাৰতৰ ওপৰত আস্থা হেৰুৱাব পাৰে।
উল্লেখ্য যে যোৱা বছৰৰ ডিচেম্বৰ মাহত আই এম এফৰ প্ৰতিবেদন ওলালেও কেন্দ্ৰই ইতিমধ্যে চৰকাৰী ঋণৰ ওপৰত চকু ৰাখিছে৷অক্টোবৰ মাহত বিত্তমন্ত্ৰী নিৰ্মলা সীতাৰমণে কয় যে কেন্দ্ৰই চৰকাৰী ঋণ হ্ৰাস কৰাৰ উপায় বিচাৰিছে আৰু ঋণ হ্ৰাসৰ বাবে কি পদক্ষেপ ল’ব পাৰি তাৰ ওপৰত নজৰ ৰাখিছে।
প্ৰতিবেদন অনুসৰি ২০১৩ চনৰ মাৰ্চ মাহৰ শেষৰ ফালে কেন্দ্ৰীয় চৰকাৰৰ ঋণ আছিল ১৫ লাখ ৫৬ হাজাৰ কোটি টকা বা জিডিপিৰ ৫৭.১ শতাংশ। একে সময়তে ৰাজ্য চৰকাৰসমূহৰ ঋণ আছিল জিডিপিৰ প্ৰায় ২৮ শতাংশ।বিভিন্ন খবৰ অনুসৰি ২০১৪ চনত নৰেন্দ্ৰ মোদী নেতৃত্বাধীন এন ডি এ ক্ষমতালৈ অহাৰ পাছৰে পৰা ভাৰতৰ জনমূৰি আয় বৃদ্ধি পাইছে।কিন্তু বিশেষজ্ঞসকলৰ মতে আয়ৰ সমান বিতৰণ ভাৰতৰ বাবে এতিয়াও এক প্ৰত্যাহ্বান। Covid জলবায়ুত এই সমস্যা অধিক ভয়াৱহ হৈ পৰিছে।
কিন্তু ব্যাপক চৰকাৰী হস্তক্ষেপৰ জৰিয়তে বিশ্বব্যাপী সামগ্ৰীৰ মূল্যবৃদ্ধিৰ মাজতে ভাৰতৰ মুদ্ৰাস্ফীতিৰ নিয়ন্ত্ৰণৰ কৃতিত্ব আই এম এফে দিছে। ভাৰতৰ অৰ্থনৈতিক বিকাশৰ বাবে এয়া এক সুষম ইংগিত।
Continue Reading
