ডিজিটেল ডেস্কঃ ট্ৰেইন টিকট অবিহনে উঠাৰ বাবেই টিটিইৰ চৰ সন্মুখীন এজন যাত্ৰী৷ এই ঘটনাত জড়িত এজন ভাৰতীয় ৰে’লৱেৰ ট্ৰেভেলিং টিকট পৰীক্ষকক বৃহস্পতিবাৰে ছ’চিয়েল মিডিয়াত ভাইৰেল হোৱাৰ পাছতে নিলম্বন কৰা হয়৷
অভিযুক্ত টিটিইৰ বিৰুদ্ধে ৰে’ল বিভাগেও তদন্ত আৰম্ভ কৰিছে বুলিও জানিব পৰা গৈছে।এই কাণ্ডৰ সৈতে জড়িত ভিডিঅ’টো এক্স, পূৰ্বতে টুইটাৰত ভাইৰেল হৈ পৰে, য’ত দেখা গৈছে যে অভিযুক্ত টিটিইজনে বাৰে বাৰে বাৰাউনি-লক্ষ্ণৌ এক্সপ্ৰেছ (১৫২০৩)ত যাত্ৰীগৰাকীক চৰ মাৰিছিল। ভিডিঅ’টোত যাত্ৰীগৰাকীয়ে অভিযুক্ত টিটিইক আক্ৰমণৰ কাৰণো সুধি থকা দেখা গৈছে।
ভিডিঅ’টোৰ প্ৰতি প্ৰতিক্ৰিয়া প্ৰকাশ কৰি ৰে’ল মন্ত্ৰী অশ্বিনী বৈষ্ণৱে কয় যে, “এনে অসৎ আচৰণৰ বাবে শূন্য সহনশীলতা, টিটিইক ইতিমধ্যে নিলম্বন কৰা হৈছে”।ইয়াৰ পূৰ্বে লক্ষ্ণৌ সংমণ্ডলৰ বিভাগীয় ৰে’লৱে পৰিচালকে ভিডিঅ’টোৰ প্ৰতি লক্ষ্য ৰাখি কয় যে, “সংশ্লিষ্ট টিটিইৰ বিৰুদ্ধে তদন্ত আৰম্ভ কৰা হৈছে।”
উল্লেখ্য যে যোৱা বছৰৰ আৰম্ভণিতে একেধৰণৰ কাণ্ডত বেংগালুৰুৰ কৃষ্ণৰাজাপুৰম ৰে’লৱে ষ্টেচনৰ সমীপত এগৰাকী মহিলা যাত্ৰীক মদ্যপান কৰি হাৰাশাস্তি কৰাৰ অভিযোগত টিটিইক নিলম্বন কৰা হৈছিল।
Continue Reading
