ডিজিটেল ডেস্কঃ ডিভ’ৰ্চী মহিলাৰ দৰে আছিল সীতাৰ জীৱন! এই মন্তব্য কৰিছে মধ্যপ্ৰদেশৰ উচ্চশিক্ষামন্ত্ৰী তথা বিজেপি নেতা মোহন যাদৱে। উজ্জয়িনীৰ এটা দলীয় অনুষ্ঠানত তেওঁ সাম্প্ৰতিক কালৰ বিবাহবিচ্ছেদিত মহিলাসকলৰ স’তে সীতাৰ তুলনা কৰে।
''ইমান দুখ-কষ্টৰ পাছতো সীতা মাতাৰ মনত তেওঁৰ স্বামীৰ প্ৰতি ইমানেই শ্ৰদ্ধা আছিল যে তেওঁ সকলো পাহৰি শ্ৰীৰামৰ জীৱনৰ বাবে প্ৰাৰ্থনা কৰিছিল। আজিৰ তাৰিখলৈ লক্ষ্য কৰিলে সীতা মাতাৰ জীৱন আচলতে এগৰাকী বিবাহবিচ্ছিন্না মহিলাৰ জীৱনৰ দৰেই!’’- মন্ত্ৰীগৰাকীয়ে এইদৰে কৈছিল।
মন্ত্ৰীগৰাকীৰ এই মন্তব্যৰ পাছতে বিৰোধী পক্ষৰ ফালৰ পৰা তীব্ৰ আক্ৰমণ কৰা হৈছে। সীতাৰ প্ৰতি অপমান কৰা হৈছে বুলি তেওঁলোকে আপত্তি কৰিছে। মন্তব্যটোৰ বাবে মন্ত্ৰীগৰাকীক পদত্যাগ কৰিবলৈও বিৰোধী দল ক্গ্ৰেছে দাবী জনাইছে।
মধ্যপ্ৰদেশৰ মুখ্যমন্ত্ৰী শিৱৰাজ সিং চৌহানলৈ উদ্দেশ্যি কংগ্ৰেছ নেতা তথা প্ৰাক্তন মুখ্যমন্ত্ৰী দিগ্বিজয় সিঙে কয়- ''শ্ৰীৰাম আৰু সীতা মাতাৰ প্ৰতি যদি আপোনাৰ অলপো শ্ৰদ্ধা আছে, তেন্তে মন্ত্ৰী মোহন যাদৱক এতিয়াই বৰ্খাস্ত কৰক।’’
বজৰং দলকো আক্ৰমণ কৰি দিগ্বিজয় সিঙে কয়- ''যিসকলে নিজকে সকলো সময়তে ৰামভক্ত বুলি কয়, বজৰং দলৰ সেই বাহুবলীসকল এতিয়া ক’ত লুকাই আছে?’’
Continue Reading
