ডিজিটেল ডেস্কঃ ভাৰতত ইতিমধ্যে নাকেৰে গ্ৰহণ কৰিব পৰা কোভিডৰ ভেকছিনৰ প্ৰচলন আৰম্ভ হৈছে৷ কিন্তু সকলো লোকেই এই ভেকছিন গ্ৰহণ কৰিব নোৱাৰিব৷ বিশেষজ্ঞসকলে প্ৰকাশ কৰা মতে যিসকলে ইতিমধ্যে বুষ্টাৰ ভেকছিন গ্ৰহণ কৰিছে তেওঁলোকে ভাৰত বায়োটেকৰ নাকেৰে গ্ৰহণ কৰিব পৰা কোভিড ভেকছিন ইনকোভাক গ্ৰহণ কৰিব নোৱাৰিব।
টিকাকৰণ সম্পৰ্কীয় ৰাষ্ট্ৰীয় কাৰিকৰী গোটৰ (এনটিএজিআই) মুৰব্বী এন কে অৰোৰাই সংবাদ মাধ্যমৰ আগত কয়, "নাকৰ কোভিড ভেকছিনক প্ৰথম বুষ্টাৰ ভেকছিন হিচাপে গ্ৰহণ কৰিব পাৰি। যদি কোনোবাই ইতিমধ্যে বুষ্টাৰ ভেকছিন গ্ৰহণ কৰিছে, তেন্তে তেওঁক নাকৰ কোভিড ভেকছিন দিয়া নহ'ব।
এই ভেকছিনটো তেওঁলোকৰ বাবে যিসকলে এতিয়ালৈকে বুষ্টাৰ ভেকছিন লাভ কৰা নাই। কো-উইন পৰ্টেলত যদি কোনোবাই চতুৰ্থবাৰৰ বাবে নাকৰ ভেকছিন বুক কৰে, ইয়াক গ্ৰহণ কৰা নহ'ব। ''এন.কে. অৰোৰাৰ মতে, এই ভেকছিনে কেৱল কোভিডৰ বিৰুদ্ধেই নহয়, শ্বাসতন্ত্ৰক আক্ৰমণ কৰা যিকোনো ভাইৰাছৰ বিৰুদ্ধেও শৰীৰৰ ৰোগ প্ৰতিৰোধ প্ৰণালী গঢ়ি তোলাত সফল হ'ব।
১৮ বছৰৰ অধিক বয়সৰ যিকোনো লোকে এই ভেকছিনটো ল'ব পাৰে। এই ভেকছিন গ্ৰহণ কৰাৰ পিছত নাকটো কিছু সময়ৰ বাবে বন্ধ থাকিব পাৰে, ইয়াৰ বাহিৰে, এই ভেকছিনৰ আন কোনো পাৰ্শ্বক্ৰিয়া নাই।
Continue Reading
