ডিজিটেল ডেস্কঃ অশান্ত মণিপুৰত পুনৰ হিংসাত্মক ঘটনা সংঘটিত হৈছে। ইম্ফলৰ এখন বিশ্ববিদ্যালয়ক এটা বিস্ফোৰণে জোকাৰি গৈছে। অই বিস্ফোৰণত এতিয়ালৈকে ১ জনৰ মৃত্যুৰ খবৰ পোৱা গৈছে। হতাহতৰ সংখ্যা বৃদ্ধি হোৱাৰ আশংকা আছে।
যোৱা নিশা ইম্ফলৰ ডিএম বিশ্ববিদ্যালয় চৌহদত এই বিস্ফোৰণ সংঘটিত হয়। বিস্ফোৰণটোত চব্বিশ বছৰীয়া অইনাম কেনিনি নিহত হয় । বিস্ফোৰণত আহত আন এজন যুৱকক চিকিৎসাধীন কৰোৱা হৈছে। তেওঁৰ অৱস্থাও সংকটজনক বুলি জানিব পৰা গৈছে। ইফালে, ঘটনাটোৰ পিছত বোম্ব স্কোয়াড বিশ্ববিদ্যালয় চৌহদত উপস্থিত হয়। প্ৰাথমিক অনুসন্ধানত প্ৰকাশ পাইছে যে বিস্ফোৰণটো সংঘটিত কৰিবলৈ এটা আইইডি ব্যৱহাৰ কৰা হৈছিল। এতিয়ালৈকে কোনেও এই বিস্ফোৰণৰ দায়িত্ব স্বীকাৰ কৰা নাই।
যোৱা বছৰৰ মে’ মাহত মণিপুৰ উচ্চ ন্যায়ালয়ে ৰাজ্য চৰকাৰক অনুসূচীত জনজাতিৰ তালিকাত মেইটেইসকলক অন্তৰ্ভুক্ত কৰিব পাৰিনে নাই সেই বিষয়ে চাৰি সপ্তাহৰ ভিতৰত সিদ্ধান্ত ল'বলৈ নিৰ্দেশ দিছিল। আদালতৰ ৰায়দানৰ পিছতে সমগ্ৰ মণিপুৰ জ্বলি উঠিছিল। কুকি-মেইটেইৰ সংঘৰ্ষত ২০০ ৰো অধিক লোক নিহত হৈছিল। অৱশেষত আদালতে নিজৰ ৰায় প্ৰত্যাহাৰ কৰিছিল আৰু কৈছিল যে অনুসূচীত জনজাতিৰ তালিকাত অন্তৰ্ভুক্তিৰ বিষয়টো কেন্দ্ৰীয় চৰকাৰৰ অধিকাৰক্ষেত্ৰৰ ভিতৰত আছে। আদালতে ইয়াত হস্তক্ষেপ কৰিব নোৱাৰে।
Continue Reading
