ডিজিটেল ডেস্কঃ এক ভয়ংকৰ দুৰ্ঘটনাৰ পৰা ৰক্ষা পৰিল বহু কেইগৰাকী শিক্ষাৰ্থী৷ শিক্ষাৰ্থীসকলে স্কুল বাছেৰে ঘৰলৈ উভতি আহিছিল। কিন্তু হঠাতে অসুস্থ হৈ পৰা চালকজনে বাছখন চলাই থকা অৱস্থাতে জ্ঞান হেৰুৱাই পেলায়। সেই মুহূৰ্ততো বাছ খন চলি গৈয়েই আছিল৷ বাছখনৰ সন্মুখৰ চিটত বহি থকা সপ্তম শ্ৰেণীৰ ডিলন ৰিভছ নামৰ ছাত্ৰ জনে এই কথা লক্ষ্য কৰিছিল আৰু বাছখন দুৰ্ঘটনাত পতিত হোৱাৰ পূৰ্বেই তেওঁ ষ্টিয়েৰিং হুইলটো ধৰিছিল। আৰু বাছখনৰ ইঞ্জিনটো বন্ধ কৰি দিছিল।ফলত এক ভয়ংকৰ দুৰ্ঘটনাৰ পৰা ৰক্ষা পৰে বাছ খনত থকা ছাত্ৰ-ছাত্ৰীসকল৷
ঘটনাটো ঘটিছে আমেৰিকাৰ মিচিগানত ৷ বাছখনৰ আন শিক্ষাৰ্থীসকলে চালকজনে জ্ঞান হেৰুওৱাৰ বিষয়ে জানিব পাৰি কান্দিবলৈ ধৰিছিল। আৰক্ষীয়ে প্ৰকাশ কৰা মতে দৃশ্যটো প্ৰত্যক্ষ কৰাৰ পিছত ৰিভছে দৌৰি গৈ বাছখনৰ ষ্টিয়েৰিং হুইলটো ধৰিছিল৷ তেওঁ ব্ৰেক মাৰি বাছখন ৰখাই দিছিল। তাৰ পিছত তেওঁ ইঞ্জিনটো বন্ধ কৰিছিল৷
ইয়াৰ পিছতে ৰিভছে ৯১১ লৈ ফোন কৰি ঘটনাটোৰ বিষয়ে জনাইছিল। চালকজনক উদ্ধাৰ কৰা হৈছিল আৰু এখন চিকিৎসালয়ত ভৰ্তি কৰোৱা হৈছিল। বাছখনৰ ভিতৰত ৬৬ জন শিক্ষাৰ্থী আছিল। আৰক্ষী বিষয়া ৰবাৰ্ট লিভাৰনোইছে কয়, "যদি সপ্তম শ্ৰেণীৰ ছাত্ৰজনে ষ্টিয়েৰিং নধৰিলেহেঁতেন তেন্তে এটা ডাঙৰ দুৰ্ঘটনা ঘটাৰ আশংকা আছিল।" সকলোৱে এতিয়া ৰিভছৰ সাহসিকতাৰ প্ৰশংসা কৰিছে। আৰক্ষীয়েও ৰিভছৰ সাহসিকতাৰ প্ৰশংসা কৰিছিল।
Continue Reading
