ডিজিটেল ডেস্কঃ গৃহযুদ্ধত বিধ্বস্ত ছুডানত আজিও অব্যাহত আছে উত্তেজনা। ইয়াৰ মাজতে অপাৰেচন কাৱেৰীৰ অধীনত চুদানত আৱদ্ধ হৈ থকা প্ৰায় ১৩৫ জন লোককলৈ বায়ুসেনাৰ এখন বিমানেৰে ছুডানৰ পৰা আজি চৌদি আৰৱৰ জেদ্দালৈ উৰা মাৰিছে। ইয়াৰ উপৰি আজি মুঠ ৭৫৪ গৰাকী ভাৰতীয়ক দেশলৈ ওভতাই অনা হ’ব।
চুদানৰ সেনাই দেশ খনত যুদ্ধবিৰতি আৰু তিনি দিনৰ বাবে বৃদ্ধি কৰিছে। অৱশ্যে যুদ্ধবিৰতি ঘোষণা কৰা স্বত্বেও দেশ খনৰ পশ্চিম অংশ আৰু ৰাজধানী খাৰ্তুমৰ দাৰ্ফুৰৰ কিছু অংশত গুলীবৰ্ষণ কৰাৰ খবৰ পোৱা গৈছে। উল্লেখ্য পূৰ্বে যুদ্ধত লিপ্ত দুয়োপক্ষই ঘোষণা কৰা যুদ্ধবিৰতি আজি সমাপ্ত হ’বলগীয়া আছিল যদিও পুনৰ তিনি দিনৰ বাবে সেয়া বৃদ্ধি কৰা হৈছে। অৰ্ধসামৰিক বাহিনীয়েও প্ৰথমবাৰৰ বাবে যুদ্ধবিৰতি ঘোষণা কৰিছে।
ভাৰতৰ বৈদেশিক পৰিক্ৰমা মন্ত্ৰালয়ে কৈছে যে অপাৰেচন কাৱেৰীৰ অধীনত চুদানত আৱদ্ধ হৈ থকা ১৩৫ জন লোকক আইএএফৰ এখন বিমানেৰে চৌদি আৰৱৰ জেদ্দালৈ নিয়াৰ ব্যৱস্থা কৰা হৈছে। বৈদেশিক পৰিক্ৰমা মন্ত্ৰী এছ জয়শংকৰে টুইটত কয় যে ৩৯২ গৰাকী ভাৰতীয় আইএএফৰ চি-১৭ বিমানেৰে নতুন দিল্লীত উপস্থিত হৈছে।
বাকী ৩৬২ জন বাংগালুৰুত উপস্থিত হৈছে। চুদানত আৱদ্ধ হৈ থকা মুঠ ১,৩৬০ জন লোক এতিয়ালৈকে ভাৰতলৈ উভতি আহিছে।এনে উদ্ধাৰ অভিযানৰ মাজতে খাৰ্তুমৰ পৰা অলপ দূৰত অৱস্থিত ৱাদি চিদনা বিমানবন্দৰত গুলীচালনাৰ ঘটনা সংঘটিত হোৱাৰ খবৰ পোৱা গৈছে। চুদানৰ সামৰিক বাহিনীয়ে বিৰোধী পেৰামিলিটাৰী বাহিনীক এই গুলীচালনাৰ বাবে দোষাৰোপ কৰিছে। তুৰ্কীৰ বৈদেশিক মন্ত্ৰীয়েও আক্ৰমণটোৰ কথা নিশ্চিত কৰিছে। অৱশ্যে, আক্ৰমণটোত কোনো লোক হতাহত হোৱাৰ খবৰ পোৱা হোৱা নাই।
Continue Reading
