ডিজিটেল ডেস্ক: লোকসভা নিৰ্বাচনৰ বাবে সাজু হৈ উঠিছে ভাৰতীয় জনতা পাৰ্টী৷ নিৰ্বাচনলৈ এতিয়াও আঢ়ৈ বছৰ বাকী আছে যদিও দলটোৱে আৰম্ভ কৰিছে পূৰ্ণপ্ৰস্তুতি৷ ভাৰতীয় জনতা পাৰ্টীয়ে দলটোৰ দুদিনীয়া ৰাষ্ট্ৰীয় কাৰ্যনিৰ্বাহক বৈঠক সমাপ্ত হোৱাৰ পাছতেই মুখ্যমন্ত্ৰী নীতিশ কুমাৰৰ জনতা দল (ইউনাইটেড)ৰ সৈতে মিত্ৰতা কৰি ২০২৪ চনৰ লোকসভা নিৰ্বাচন আৰু ২০২৫ চনৰ বিহাৰ বিধানসভা নিৰ্বাচনত প্ৰতিদ্বন্দ্বিতা কৰাৰ সিদ্ধান্ত লৈছে।
বিজেপিৰ ৰাষ্ট্ৰীয় সাধাৰণ সম্পাদক অৰুণ সিঙে পাটনাত এখন সংবাদমেল সম্বোধন কৰি জেডি(ইউ)ৰ সৈতে যিকোনো ধৰণৰ বিভেদৰ অনুমান খাৰিজ কৰে। তেওঁ কয়, জেডি(ইউ)ৰ সৈতে কোনো ধৰণৰ সংঘাত চলি থকা নাই আৰু বিজেপিয়ে সদায় মিত্ৰজোঁটৰ ধৰ্ম অনুসৰণ কৰি আহিছে। আমি একেলগে নিৰ্বাচনত যুঁজিম, সেয়া ২০২৪ হওক বা ২০২৫ চনত হওক৷
কেন্দ্ৰীয় মন্ত্ৰী আৰু বিজেপি নেতা গিৰিৰাজ সিঙেও ৰাষ্ট্ৰীয় সংবাদ প্ৰতিষ্ঠানৰে হোৱা বাৰ্তালাপত একে ধৰণৰ চিন্তন ব্যক্ত কৰিছিল, য’ত তেওঁ দৃঢ়তাৰে কৈছিল যে গেৰুৱা দলে জেডি(ইউ)ৰ সৈতে মিত্ৰতা কৰি ভৱিষ্যতৰ সকলো নিৰ্বাচনত প্ৰতিদ্বন্দ্বিতা কৰিব। তেওঁ কয়, আমি সদায় জেডি(ইউ)ৰ সৈতে মিত্ৰতা কৰি যুঁজ দিম। কেৱল ২০২৪ আৰু ২০২৫ চনতেই নহয় আনকি তাৰ পিছতো৷
উল্লেখযোগ্যে যে, ২০২৪ চনৰ লোকসভা নিৰ্বাচনৰ উদ্দেশ্য আগত ৰাখি বিজেপিয়ে নীতিশ কুমাৰক বিচলিত নকৰাৰ সিদ্ধান্ত লৈছে৷
Continue Reading
