ডিজিটেল ডেস্কঃ সমলিংগ বিবাহৰ আপত্তি জনাইছে মোদী চৰকাৰে। এই সন্দৰ্ভত কেন্দ্ৰীয় চৰকাৰে উচ্চতম ন্যায়ালয়ক শপতনামা দিছে।
শপতনামাখনত সমলিংগ বিবাহক আইনী স্বীকৃতি দিয়াৰ বিৰোধিতা কৰি কোৱা হৈছে যে অসমলিংগ বিবাহ আৰু সমলিংগ বিবাহৰ মাজত স্পষ্ট বিভাজন আছে। গতিকে দুয়োটাকে একে ধৰণে চাব নালাগে। লগতে কোৱা হৈছে যে সমলিংগ সম্পৰ্কক স্বীকৃতি দিয়াৰ অৰ্থ সমলিংগ বিবাহক স্বীকৃতি দিয়া নহয়।
একে সময়তে মোডী চৰকাৰে অসমলিংগ বিবাহৰ ‘সামাজিক মূল্য’ আছে বুলি দাবী কৰিছে। শপতনামাত লগতে দাবী কৰা হৈছে সমলিংগ বিবাহৰ কোনো সামাজিক মূল্য নাই।
উল্লেখ্য যে উচ্চতম ন্যায়ালয়ে সমলিংগ সম্পৰ্কক বৈধ ঘোষণা কৰিছে। যদিও উচ্চতম ন্যায়ালয়ৰ এই ৰায়ৰ পিছত দেশত সমলিংগ সম্পৰ্ক এতিয়া ‘অবৈধ’ নহয়, তথাপিও দেশত সমলিংগ বিবাহৰ আইনী স্বীকৃতি নাই।
সোমবাৰে এই গোচৰত দুয়োপক্ষৰ বক্তব্য শুনানি গ্ৰহণ কৰিব উচ্চতম ন্যায়ালয়ে। তাৰ মাত্ৰ এদিন পূৰ্বে কেন্দ্ৰই উচ্চতম ন্যায়ালয়ত শপতনামা দিছিল। দেশৰ বিভিন্ন আদালতত সমলিংগ বিবাহক আইনী স্বীকৃতি বিচাৰি কেইবাখনো আৱেদন দাখিল কৰা হয়।
৬ জানুৱাৰীত উচ্চতম ন্যায়ালয়ে আনুষংগিক সকলো গোচৰ একত্ৰিত কৰাৰ নিৰ্দেশ দিছিল। একে সময়তে তেওঁলোকে সমলিংগ বিবাহৰ আইনী স্বীকৃতিৰ সৈতে জড়িত গোচৰৰ শুনানি গ্ৰহণ কৰিব। সোমবাৰে মুখ্য ন্যায়াধীশ ডি ৱাই চন্দ্ৰচুদ, পি এছ নৰসিংহ আৰু জে বি পাৰ্দিৱালাৰ বিচাৰপীঠে শুনানি গ্ৰহণ কৰাৰ কথা।
৬ জানুৱাৰীত আদালতে আবেদনকাৰীৰ অধিবক্তা অৰুন্ধতী কাটজু আৰু কেন্দ্ৰীয় চৰকাৰৰ অধিবক্তাক সকলো তথ্য, নথি-পত্ৰ, শপতনামাৰে নিজৰ স্থিতি স্পষ্ট কৰিবলৈ নিৰ্দেশ দিছিল। আদালতে লগতে কয় যে দুয়োপক্ষই তেওঁলোকৰ বক্তব্যৰ সমৰ্থনত প্ৰদান কৰা তথ্যসমূহ এখন কিতাপত সংকলিত কৰা হ’ব আৰু আদালতৰ লগতে গোচৰটোৰ সৈতে জড়িত সকলো পক্ষৰ বাবে উপলব্ধ হ’ব। উচ্চতম ন্যায়ালয়ৰ ৱেবছাইট অনুসৰি এই গোচৰটো ১৩ মাৰ্চ (সোমবাৰ)ৰ শুনানিৰ বাবে তালিকাভুক্ত কৰা হৈছে।
Continue Reading
