সংবাদমেলত মোদীৰ বিৰুদ্ধে ৰাহুল গান্ধীৰ বাক্যশেল : আদানিকলৈ প্ৰশ্ন কৰাৰ বাবেই মই ৰোষত পৰিলো

সংবাদমেলত ৰাহুলে কয় "মোদী প্ৰধানমন্ত্ৰী হোৱাৰ পিছতে, মই আদানীয়ে তেওঁৰ সৈতে একেখন বিমানত  যোৱা ফটোখনক লৈ প্ৰশ্ন উত্থাপন কৰিছিলো। ইয়াৰ পিছতে দেশৰ বিভিন্ন বিমানবন্দৰ অবৈধ ভাৱে আদানিক হস্তান্তৰ কৰা হৈছে। ''

ৰাহুলে দাবী কৰে  যে মোদীৰ সৈতে আদানিৰ সম্পৰ্ক "দীৰ্ঘদিনীয়া"।ৰাহুলে কয় "কিন্তু মই নাজানো তেওঁ (আদানি) ক'ৰ পৰা আহিছিল। মই ভয় নকৰোঁ," ৷ তেওঁ কয় যে নিম্ন  আদালতৰ ৰায় ব্যৱহাৰ কৰি তেওঁক সাংসদ হিচাপে বৰ্খাস্ত কৰা হ'লেও তেওঁ দেশৰ স্বাৰ্থত যুঁজ অব্যাহত ৰাখিব।

উল্লেখ্য গুজৰাটৰ চুৰাটৰ এখন আদালতে বৃহস্পতিবাৰে ৰাহুল গান্ধীক 'মোদী' উপাধিৰ বিৰুদ্ধে কৰা অপমানজনক মন্তব্যৰ বাবে দুবছৰৰ কাৰাদণ্ড প্ৰদান কৰিছে। ইয়াৰ ভিত্তিত শুকুৰবাৰে লোকসভাৰ অধ্যক্ষ ওম বিৰলাই ভাৰতীয় সংবিধানৰ ১০২(১)-ই অনুচ্ছেদ আৰু জনপ্ৰতিনিধিত্ব আইনৰ (১৯৫১) অনুচ্ছেদ ৮ ৰ অধীনত ৰাহুল গান্ধীৰ সাংসদ পদ খাৰিজ কৰে। সংবাদমেলত ৰাহুল গান্ধীয়ে উদাত্ত কণ্ঠৰে কয় "প্ৰধানমন্ত্ৰীয়ে সংসদত মোৰ পৰৱৰ্তী ভাষণক লৈ ভয় খাইছিল। সেইকাৰণে এনে কৰা হৈছে। ''তেওঁ লগতে প্ৰশ্ন কৰে যে কেনেকৈ আদানি গোষ্ঠীৰ  এটা প্ৰতিৰক্ষা প্ৰতিষ্ঠানে ৰাতিটোৰ ভিতৰতে ২০,০০০ কোটি টকা লাভ কৰিছিল। কেইমাহমান আগতে শ্ৰীলংকাৰ বিদ্যুৎ পৰিষদৰ অধ্যক্ষই মোদীয়ে   আদানিক বিদ্যুৎ প্ৰকল্পটোৰ কাম  দিয়াৰ বাবে দিয়া  হেঁচাৰ কথাও ৰাহুলে সোঁৱৰাই দিয়ে।

বিজেপি শিবিৰে তেওঁৰ ব্ৰিটেইন ভ্ৰমণৰ সময়ত "দেশক অপমান" কৰা বুলি কৰা অভিযোগ খণ্ডন কৰি প্ৰাক্তন সাংসদগৰাকীয়ে কয়, "মই কোনো দেশবিৰোধী মন্তব্য কৰা নাই। তেওঁলোকৰ (বিজেপি) সমস্যাটো হ'ল যে তেওঁলোকে আদনিৰ অপমানক দেশৰ অপমান বুলি বিবেচনা কৰে। ''