ডিজিটেল ডেস্কঃ কৃষক নেতা ৰাকেশ টিকাইটক ক’লা চিয়াঁহীৰে আক্ৰমণ কৰে এজন লোকে। যি ঘটনাই চাঞ্চল্যৰ সৃষ্টি কৰিছে। বাংগালুৰুৰ গান্ধী ভৱনত এখন সংবাদমেল অনুষ্ঠিত কৰিছিল ৰাকেশ টিকাইটে। সেই সংবাদমেলতে ৰাকেশ টিকাইটৰ গালৈ ক’লা চিয়াঁহী নিক্ষেপ কৰে লোকজনে। ইতিমধ্যে চিয়াঁহী নিক্ষেপ কৰা ব্যক্তিজনক আটক কৰিছে আৰক্ষীয়ে।
তথ্য অনুসৰি গান্ধী ভৱনত কৃষক নেতা ৰাকেশ টিকাইট আৰু যুধবীৰ সিঙে এখন সংবাদমেল অনুষ্ঠিত কৰিছিল। দুয়োজন কৃষক নেতাই স্থানীয় এটা চেনেলৰ ষ্টিং অপাৰেচনৰ ভিডিঅ’টোত স্পষ্টীকৰণ দিবলৈ আহিছিল। সংবাদমেলৰ মাজতে তাত উপস্থিত থকা ৰাইজৰ মাজত বিতৰ্ক আৰম্ভ হয়। এই ঘটনাত চন্দ্ৰশেখৰৰ সমৰ্থকৰ বিৰুদ্ধে অভিযোগ উঠিছে। তাত উপস্থিত ৰাইজে জনোৱা মতে, সংবাদমেলৰ সময়ত সাংবাদিকসকলে যেতিয়া ৰাকেশ টিকাইটক সুধিছিল যে কৃষক নেতা চন্দ্ৰশেখৰক লৈ আপোনালোকৰ কি ক’বলগীয়া আছে।
ইয়াৰ উত্তৰত টিকাইটে কয় যে তেওঁৰ লগত আমাৰ কোনো সম্পৰ্ক নাই। এই কথা শুনি চন্দ্ৰশেখৰৰ এজন সমৰ্থকে ক্ষুব্ধ হৈ টিকাইতৰ ওপৰত চিয়াঁহী দলিয়াইছিল। এই ঘটনাৰ পিছতে অনুষ্ঠানটোত দুয়োটা পক্ষৰ মাজত ইজনে সিজনৰ গালৈ চকী দলিয়াইছিল। শেহতীয়া তথ্য অনুসৰি এই ঘটনাৰ পিছতে তিনিজন লোকক আটক কৰা হৈছে। এই আকস্মিক ঘটনাত সকলো হতভম্ব হৈ উঠে।
সংবাদ মাধ্যমৰ সৈতে হোৱা কথা-বতৰাত ৰাকেশ টিকাইটে কয় যে ইয়াত নিৰাপত্তা বজাই ৰখাটো স্থানীয় আৰক্ষীৰ দায়িত্ব।ইয়াত স্থানীয় আৰক্ষীয়ে কোনো ধৰণৰ নিৰাপত্তাৰ ব্যৱস্থা কৰা নাই। চৰকাৰৰ বিৰুদ্ধে অভিযোগ উত্থাপন কৰি তেওঁ কয় যে চৰকাৰৰ সহমতত এই সকলোবোৰ ঘটিছে৷
Continue Reading
