ডিজিটেল ডেস্ক: ‘এজন গাড্ডাৰ কেতিয়াও মুখ্যমন্ত্ৰী হ’ব নোৱাৰে৷ কংগ্ৰেছ হাইকমাণ্ডেও শচীন পাইলটক মুখ্যমন্ত্ৰী কৰিব নোৱাৰে৷’— ঠিক এইদৰেই বিষোদগাৰ কৰি শচীন পাইলটৰ বিৰুদ্ধে মুকলি সংঘাতৰ পাতনি মেলিছিল অশোক গেহলটে৷
অক্টোবৰত কংগ্ৰেছৰ সভাপতি হোৱাৰ সুযোগ সমৰ্পণ কৰা গেহলটে পাইলট শিবিৰৰ এজন আইন প্ৰণেতাই গান্ধীৰ যাত্ৰাত বাধা দিয়াৰ ভাবুকি দিয়াৰ পাছত ক্ষোভ প্ৰকাশ কৰিছিল। আৰু দীঘলীয়া সংঘাতৰ অৱসান ঘটাই কালি একেখন মঞ্চত দেখা গৈছিল গেহলট-পাইলটক৷ দলীয় হাইকমাণ্ডে সংঘাত নিবিচাৰি ৰাজস্থানত ভাৰত জোড়ো যাত্ৰা প্ৰৱেশৰ প্ৰাকমুহূৰ্তৰ সংঘাত মৰিষণৰ চেষ্টা চলাইছিল৷
ৰাহুল গান্ধীয়ে গেহলট আৰু পাইলট দুয়োকে 'সম্পদ' বুলি অভিহিত কৰিছিল৷ আৰু গেহলটে সাংবাদিকসকলক কৈছিল, যদি ৰাহুল গান্ধীয়েই কৈছে, তেন্তে আমি সম্পদ৷ আমি যাত্ৰাটো সফল কৰিম আৰু ২০২৩ চনৰ নিৰ্বাচনত জয়ী হ'ম, কিয়নো মানুহে আমাক সমৰ্থন কৰে৷
দলৰ সাধাৰণ সম্পাদক কেচি বেণুগোপালেও ৰাজস্থানত কোনো বিবাদ নাই বুলি জোৰ দি কৈছিল৷ ৰাজস্থানে অহা বছৰ এখন নতুন চৰকাৰৰ বাবে ভোট দিব৷ আৰু ২০২৪ চনৰ লোকসভা নিৰ্বাচনৰ পূৰ্বে ৰাজনৈতিক প্ৰাসংগিকতাৰ বাবে যুঁজ দিয়া কংগ্ৰেছৰ বাবে এয়া অতি গুৰুত্বপূৰ্ণৰূপে বিবেচিত হৈছে৷
Continue Reading
