ডিজিটেল ডেস্কঃ লাহে লাহে সুস্থ হৈ উঠিছে ঋষভ পন্ত। চিকিৎসালয়ত কেনেদৰে দিন কটাইছে ঋষভ পণ্টে? এই সন্দৰ্ভত বক্তব্য আগবঢ়াইছে টীম ইণ্ডিয়াৰ প্ৰাক্তন অধিনায়ক তথা বিচিচিআইৰ প্ৰাক্তন সভাপতি সৌৰভ গাংগুলীয়ে। গাংগুলীয়ে আইপিএলত দিল্লী কেপিটেলছৰো পৰিচালক হিচাপে কাৰ্যনিৰ্বাহ কৰি আছে। ঋষভ পণ্ট এই দিল্লী কেপিটেলছৰে অধিনায়ক।
বৰ্তমান দলটো গাংগুলীৰ অধীনত কলকাতাত প্ৰস্তুতি শিবিৰত ব্যস্ত হৈ আছে। সংবাদ সংস্থাৰ সৈতে হোৱা এক সাক্ষাৎকাৰত সৌৰভ গাংগুলীয়ে কয় যে, ''পণ্টৰ স’তে মই দুবাৰমান কথা পাতিছো। কঠিন সময়ৰ মাজেৰে পাৰ হৈছে তেওঁ। প্ৰথমে আঘাত, তাৰ পিছত অস্ত্ৰোপচাৰ। আশা কৰিছো সোনকালে সুস্থ হৈ উঠিব। হয়তো এই বছৰৰ শেষৰ ফালে বা দুবছৰমানৰ ভিতৰতে তেওঁক ভাৰতীয় দলৰ হৈ খেলা দেখা যাব।"
আই পি এলৰ সময়ত তেওঁ পণ্ট দলৰ সৈতে থাকিব বিচাৰে নেকি? সৌৰভে উত্তৰ দিলে, “এতিয়াও সিদ্ধান্ত লোৱা নাই। চোৱা যাওক!” অৱশ্যে বিচিচিআইৰ প্ৰাক্তন সভাপতিগৰাকীয়ে স্বীকাৰ কৰে যে পণ্টৰ বিকল্প বিচৰাৰ সময় আহি পৰিছে।
এই সাক্ষাৎকাৰত সৌৰভে কে এল ৰাহুলৰ বিষয়েও বহু কথা কয়। তেওঁ কয়- ''ভাৰতৰ হৈ প্ৰতিদ্বন্দ্বিতা কৰিব নোৱাৰিলে সমালোচনা শুনিবই লাগিব। কেৱল ৰাহুল নহয়। বিগত সময়তো বহু ক্ৰিকেটাৰৰ লগত এনেকুৱা হৈছে।’’
গতিকে বাৰে বাৰে ৰাহুলক কিয় সুযোগ দিয়া হৈছে? তাৰ বাবে সৌৰভেও যুক্তি দিলে। তেওঁ কয়, ‘এতিয়া প্ৰতিজন ক্ৰিকেটাৰৰ ওপৰত যথেষ্ট হেঁচা পৰিছে। মেনেজমেণ্টে হয়তো অনুভৱ কৰে যে ৰাহুল দলৰ বাবে অতি গুৰুত্বপূৰ্ণ খেলুৱৈ। দিনৰ শেষত সকলো নিৰ্ভৰ কৰে প্ৰশিক্ষক আৰু অধিনায়কৰ মানসিকতাৰ ওপৰত।’’
Continue Reading
