ডিজিটেল ডেস্কঃ দেশৰ প্ৰতিৰক্ষাৰ ক্ষেত্ৰ খন এতিয়া বহু শক্তিশালী হৈ পৰিছে। চীন-পাকিস্তানৰ পৰা আহি থকা অহৰহ ভাবুকিৰ মাজতে প্ৰতিৰক্ষা গৱেষণা আৰু উন্নয়ন সংস্থাই (ডিআৰডিঅ') ঘৰুৱা প্ৰযুক্তিৰে নিৰ্মাণ কৰা অতি-কম দূৰত্বৰ এণ্টি-এয়াৰক্ৰাফ্ট মিছাইলৰ সফল পৰীক্ষণ সম্পন্ন কৰিছে।
প্ৰতিৰক্ষা মন্ত্ৰালয়ৰ সূত্ৰই জনোৱা মতে উৰিষ্যাৰ চান্দিপুৰত ইণ্টিগ্ৰেটেড টেষ্ট ৰেঞ্জৰ (আইটিআৰ) পৰা পৰীক্ষণ কৰা দুটা 'লেণ্ড-টু-এয়াৰ' মিছাইলে বংগোপসাগৰৰ নিৰ্দিষ্ট লক্ষ্যত আঘাত কৰিবলৈ সক্ষম হয়।প্ৰতিৰক্ষা বিশেষজ্ঞসকলৰ মতে এই সফল পৰীক্ষণৰ ফলস্বৰূপে ভৱিষ্যতে ভাৰতে আকাশী প্ৰতিৰক্ষাৰ ক্ষেত্ৰত বহুদূৰ আগুৱাই যাব। এই অতি কম দূৰত্বভেদী 'লেণ্ড-টু-এয়াৰ' মিছাইলটোক সামৰিক পৰিভাষাত 'ভেৰী শ্বৰ্ট ৰেঞ্জ এয়াৰ ডিফেন্স চিষ্টেম' (ভিএছ-হোৰাডছ) বুলি কোৱা হয়।
'ইলেক্ট্ৰ-অপ্টিকেল ট্ৰেকিং চিষ্টেম'ৰ সহায়ত অতি কম উচ্চতাত উৰি থকা শত্ৰুৰ বিমান, ড্ৰোন আৰু মিছাইল চিনাক্ত কৰি সেইবোৰ ধ্বংস কৰিবলৈ ই সক্ষম হ’ব। এই মিছাইলটো কেৱল এজন সৈনিকেই কঢ়িয়াই নিব পাৰিব আৰু এজন সৈনিকেই নিক্ষেপ কৰিবও পাৰিব।
এই মিছাইল নিৰ্মাণৰ সৈতে প্ৰতিৰক্ষা গৱেষণা আৰু উন্নয়ন গৱেষণাগাৰ (ডিআৰডিএল), হায়দৰাবাদ স্থিত গৱেষণা কেন্দ্ৰ ইমাৰাট (আৰচিআই) আৰু পুনেস্থিত গৱেষণা আৰু বিকাশ অভিযন্তাৰ দৰে একাধিক প্ৰতিষ্ঠানৰ বিজ্ঞানীসকল জড়িত হৈ আছে। প্ৰতিৰক্ষা মন্ত্ৰী ৰাজনাথ সিঙে মিছাইলবিধৰ সফল পৰীক্ষণৰ বাবে বিজ্ঞানীসকলক অভিনন্দন জনাই কয়, "এনে পৰীক্ষণে আমাৰ সশস্ত্ৰ বাহিনীৰ প্ৰযুক্তিগত উৎকৰ্ষতাক এক নতুন মাত্ৰা প্ৰদান কৰিব।"
Continue Reading
