ডিজিটেল ডেস্কঃ বিহাৰৰ পৰা আহি পৰিছে এক বিশেষ খবৰ৷দেওবাৰে বিহাৰ আৰক্ষীয়ে প্ৰকাশ কৰা অনুসৰি বিহাৰৰ মুজাফৰপুৰ জিলাত বিষাক্ত সুৰা সেৱন কৰাৰ ফলত দুজন লোকৰ মৃত্যু হোৱাৰ বিপৰীতে আন তিনিজনে দৃষ্টিশক্তি হেৰুৱাইছে। পোখাৰীয়া পীৰৰ একাংশ লোকৰ স্বাস্থ্যৰ অৱনতি ঘটা তথ্য আৰক্ষীয়ে লাভ কৰাৰ লগে লগে এই ঘটনা পোহৰলৈ আহে।
তদন্তৰ অন্তত পোহৰলৈ আহিছে যে দুই তিনিদিন পূৰ্বে বিষাক্ত সুৰা সেৱন কৰিছিল।যাৰ ফলত দুজন লোকৰ মৃত্যু হয় আৰু তিনিজন লোকে চকুৰ দৃষ্টিশক্তি হেৰুৱাই পেলাই।ইয়াৰ পৰিপ্ৰেক্ষিতত চকুৰ দৃষ্টিশক্তি হেৰুওৱা ভুক্তভোগী ধৰ্মেন্দ্ৰ ৰামে নিম্নমানৰ আৰু ভেজাল মদ বিক্ৰীৰ বাবে পৰিচিত শিৱচন্দ্ৰ পাছৱানৰ ঘৰত মিশ্ৰিত সুৰা সেৱন কৰাৰ কথা প্ৰকাশ কৰে।ধৰ্মেন্দ্ৰই এই মদ দুগিলাচ এশ টকাত সেৱন কৰিছিল, তাৰ পাছত ক্ৰমান্বয়ে তেওঁৰ দৃষ্টিশক্তি হেৰুৱাবলৈ ধৰে।
ভুক্তভোগীৰ বক্তব্যৰ ভিত্তিত আৰক্ষীয়ে দুজন লোকক জিম্মাত লৈছে। ইয়াৰে এজন স্থানীয় বাসিন্দা যিয়ে পূৰ্বে মদ্যপান সম্পৰ্কীয় গোচৰত কাৰাগাৰত বন্দী হৈছিল।আৰক্ষীয়ে শিৱচন্দ্ৰ পাছৱানৰ পত্নী আৰু কন্যাকো জেৰাৰ বাবে আটক কৰিছে।উল্লেখ্য যে বিহাৰৰ মতিহাৰী জিলাত ভুৱা সুৰা সেৱন কৰি ২৭ জন লোকে প্ৰাণ হেৰুৱাৰ কেইবামাহো পাছত এই ঘটনা সংঘটিত হৈছে।
Continue Reading
