ডিজিটেল ডেস্কঃ সুৰাসক্তিত যে কেৱল মানুহেই আবদ্ধ হয় তেনে নহয়। কুকুৰো হ’ব পাৰে সুৰাৰ প্ৰতি আসক্ত । তেনে এচা সুৰাসক্ত কুকৰেই শেহতীয়াকৈ সুৰাৰ আসক্তিৰ পৰা মুক্তি লাভ কৰিছে। ব্ৰিটেইনৰ প্লাইমাউথৰ লেব্ৰেডৰ প্ৰজাতিৰ 'কোকো' নামৰ কুকুৰটো সুৰাত আসক্ত হৈ পৰিছিল।
কোকোৰ গৰাকীয়ে প্ৰতিদিনে সুৰা পান কৰিছিল। গৰাকীয়ে পান কৰি এৰি থৈ যোৱা সুৰা কুকুৰটোৱে পান কৰিছিল। এনেদৰে নিতৌ সুৰাপান কৰি কৰি কুকুৰটো সুৰাসক্ত হৈ পৰিছিল। সুৰা পান নকৰাকৈ থকাটো কুকুৰটোৰ বাবে অসহনীয় কথা হৈ পৰিছিল। কুকুৰটোৰগৰাকীয়ে কথাষাৰ মন কৰি কুকুৰটোৰ বাবেওসুৰা গিলাচ ভৰ্তি কৰি ৰাখিছিল।
কুকুৰটোৱে সেই সুৰা আনন্দ মনে পান কৰি গৈছিল। কুকুৰটোৰ মালিকৰ মৃত্যুৰ পিছত কোকোৰ অৱস্থা বেয়াৰ পিনে ঢাল খায়।সুৰাপান কৰিবলৈ নাপাই কুকুৰটো খীণাই যায়, ভৰি কঁপিবলৈ আৰম্ভ কৰে। এই কথা জানিব পাৰি ব্ৰিটেইনৰ এনিমেল ৱেলফেয়াৰ ট্ৰাষ্টে কুকুৰটোৰ যত্ন ল’বলৈ আৰম্ভ কৰে।
কুকুৰটোক নিচামুক্তিৰ বাবে সকলো ধৰণৰ দৰব প্ৰয়োগ কৰা হয়। লাহে লাহে কুকুৰটোৱে সুৰাৰ আসক্তিৰ পৰা মুক্ত হ’বলৈ সক্ষম হয়। এতিয়া 'কোকো' নামৰ কুকুৰটো সুৰাৰ আসক্তিৰ পৰা মুক্ত হোৱা বিশ্বৰ প্ৰথম কুকুৰ হৈ পৰিছে।
Continue Reading
