ডিজিটেল ডেস্কঃ শুই থকা এটি ২ মহীয়া শিশুক এটা বান্দৰে উঠাই নিয়াৰ ফলত ঘটিল এক কৰুণ ঘটনা। শিশুটিক শুই থকা অৱস্থাতে বান্দৰটোৱে উঠাই নি ছাদৰ পৰা তললৈ পেলাই দিয়ে। এই ঘটনাত ফুলকুমলীয়া শিশুটিৰ থিতাতে বেদনাদায়ক মৃত্যু হয়। এই ঘটনাৰ পাছতেই অঞ্চলটোত তীব্ৰ চাঞ্চল্যৰ সৃষ্টি হৈছে। পৰিয়ালৰ লগতে সমগ্ৰ অঞ্চলটোত পৰিছে গভীৰ শোকৰ ছাঁ। শোকসন্তপ্ত পৰিয়ালবৰ্গই মৰণোত্তৰ পৰীক্ষা নকৰাকৈয়ে শিশুটিৰ শেষ ৰীতি-নীতি সম্পন্ন কৰে। এই কৰুণ ঘটনা সংঘটিত হৈছে উত্তৰ প্ৰদেশৰ বাণ্ডাত।
বিশ্বেশ্বৰ বাৰ্মাৰ ২ মহীয়া পুত্ৰক ঘৰৰ বাৰান্দাত সন্ধিয়া সময়ত শুৱাই ৰাখিছিল মাতৃয়ে। শিশুটিক শুৱাই মাতৃগৰাকী ঘৰৰ আন আন কামত নিয়োজিত হৈ আছিল। ইয়াৰ মাজতে হঠাৎ বান্দৰ এটা আহি শিশুটিক তুলি ছিৰিৰ সহায়ত উঠি ছাদৰ ওপৰলৈ লৈ যায়।
শিশুটিৰ কান্দোন শুনি ঘৰৰ মানুহ ওলাই আহি এই দৃশ্য দেখি হুলস্থুল কৰিবলৈ ধৰিলে। সেই সময়তে বান্দৰটোৱে শিশুটিক ছাদৰ পৰা তললৈ পেলাই দিয়ে। শিশুটিক খৰখেদাকৈ হাস্পতাললৈ লৈ যায় পৰিয়ালৰ লোকে। শিশুটিক মৃত বুলি ঘোষণা কৰে চিকিৎসকে।
ইয়াৰ পিছত পৰিয়ালৰ লোকে মৰণোত্তৰ পৰীক্ষা নকৰাকৈয়ে শিশুটিৰ শেষ ৰীতি-নীতিও সম্পন্ন কৰে। এই ঘটনাত মাতৃসহ পৰিয়ালৰ লোকসকল শোকত ভাগি পৰিছে।
গাঁওবুঢ়াকে ধৰি গাঁৱৰ ৰাইজে বনবিভাগক বান্দৰ ধৰিবলৈ অভিযোগ দাখিল কৰিছে।
Continue Reading
