ডিজিটেল ডেস্কঃ বলিউডৰ বাদশ্বাহ শ্বাহৰুখ খানক কাষত পাই উল্লাসিত হৈ পৰিল হলিউডৰ এগৰাকী নামজ্বলা অভিনেত্ৰী। শেহতীয়াকৈ শ্বাহৰুখে চৌদী আৰৱিয়াৰ জেদ্দাহত অনুষ্ঠিত ৰেড ছী ইণ্টাৰনেচনেল ফিল্ম ফেষ্টিভেলত অংশ লয়। শ্বাহৰুখৰ উপৰিও বলিউডৰ প্ৰিয়ংকা চোপ্ৰা, কাজল আৰু এ আৰ ৰহমানো তাত উপস্থিত আছিল।
অনুষ্ঠানত শ্বাহৰুখে হলিউডৰ অভিনেত্ৰী শ্বাৰ’ন ষ্ট’নৰ কাষত বহে। যেতিয়া অনুষ্ঠানটোৰ ঘোষকে শ্বাহৰুখ খানৰ নাম লয়, তেতিয়া শ্বাৰ’ণ ষ্ট’ন হতবাক হৈ পৰে। কৈ উঠে- “হে ভগৱান, এইজনেই শ্বাহৰুখ খান!’ শ্বাৰ’নৰ এই প্ৰতিক্ৰিয়াৰ প্ৰত্যুত্তৰ হিচাপে শ্বাহৰুখে অভিনেত্ৰীগৰাকীক ‘নমস্তে’ বুলি কয়। সমগ্ৰ মুহূৰ্তটোৰ ভিডিঅ’ই সামাজিক মাধ্যমত ভাইৰেল হৈ পৰিছে।
উল্লেখ্য যে শ্বাৰ’ন ষ্ট’ন হৈছে ৯০ দশকত হলিউডত তোলপাৰ লগোৱা এগৰাকী অভিনেত্ৰী। যিসকলে বেচিক ইনষ্টিংক্ট, কেছিন’ৰ দৰে ছৱিসমূহ উপভোগ কৰিছে, তেওঁলোকৰ বাবে শ্বাৰ’ন ষ্ট’ন চিনাকি নাম। হলিউডৰ অন্যতম যৌন আবেদময়ী তাৰকা হিচাপে শ্বাৰণক কোৱা হয়।
আনহাতে, উক্ত অনুষ্ঠানটোত শ্বাহৰুখক বিশেষভাৱে সন্মানিত কৰা হয়। অনুষ্ঠানত আৰবিক ভাষাত তেওঁ বক্তৃতাও প্ৰদান কৰে।
Continue Reading
