ডিজিটেল ডেস্কঃ উৰিষ্যাৰ স্বাস্থ্য মন্ত্ৰী নৱকিশোৰ দাসলৈ উদ্দেশ্যি গুলীচালনাৰ চাঞ্চল্যকৰ ঘটনা সংঘটিত হৈছে। আৰক্ষীৰ তথ্য অনুসৰি, এজন সহকাৰী আৰক্ষী উপ-পৰিদৰ্শকে এই গুলীচালনা কৰে। ওড়িশাৰ ঝাৰছুগুদা জিলাৰ ব্ৰজৰাজনগৰৰ গান্ধী চ’কৰ সমীপত দেওবাৰে পুৱা সংঘটিত হয় এই ঘটনা। স্বাস্থ্যমন্ত্ৰীজনৰ বুকুত দুবাৰকৈ গুলী লাগিছিল।
গুলীবিদ্ধ হৈ গুৰুতৰভাৱে আঘাতপ্ৰাপ্ত হোৱাৰ পাছতে ওচৰৰ চিকিৎসালয়ত ভৰ্তি কৰোৱা হয় স্বাস্থ্যমন্ত্ৰীজনক। অৱস্থাৰ অৱনতি ঘটাৰ লগে লগে তেওঁক ঝাৰছুগুদা বিমানবন্দৰলৈ লৈ যোৱা হয়। তাৰ পৰাই তেওঁক বিমানেৰে ভুৱনেশ্বৰৰ এখন চিকিৎসালয়লৈ নিয়া হয়।
জানিব পৰা মতে, দেওবাৰে পুৱা গান্ধী চকত এখনি মুকলি সভাত অংশগ্ৰহণ কৰিবলৈ গৈছিল নৱকিশোৰে। মন্ত্ৰীগৰাকীক আদৰিবলৈ মানুহৰ ভীৰ হয়। ভীৰৰ মাজৰ পৰা বন্দুকৰ গুলীৰ শব্দ শুনা যায়। ইয়াৰ পিছতে দেখা যায় গুলি চলোৱাৰ পাছতে এজন পুলিচে পলায়ন কৰিছে।
ব্ৰজৰাজনগৰ মহকুমা আৰক্ষী বিষয়া গুপ্তেশ্বৰ ভৈয়ে ঘটনা সংক্ৰান্তত কয়, ‘সহকাৰী মহকুমা পৰিদৰ্শক গোপাল দাসে গুলীচালনা কৰে। গুৰুতৰভাৱে আহত মন্ত্ৰীগৰাকীক চিকিৎসালয়ত ভৰ্তি কৰোৱা হয়।’’
আৰক্ষী সূত্ৰৰ পৰা জানিব পৰা মতে, স্বাস্থ্যমন্ত্ৰীক গুলীয়াই হত্যা কৰাৰ সময়ত গোপালে আৰক্ষীৰ পোছাক পৰিধান কৰি আছিল। তেওঁ কিয় এই অপৰাধ সংঘটিত কৰিলে সেয়া এতিয়াও জানিব পৰা হোৱা নাই। দেওবাৰৰ অনুষ্ঠানত কটকটীয়া নিৰাপত্তা ব্যৱস্থা কৰা হৈছিল। তাত গোপাল দাসক নিযুক্তি দিয়া হৈছিল।
Continue Reading
