শ্বেহেনশ্বাহৰ দুৱাৰত টোকৰ ক্ৰিকেটৰ ভগৱানৰ! কিং খানকো চেৰ পেলালে মাষ্টাৰ ব্লাষ্টাৰে...

নতুন দিল্লীঃ আজিৰ পৰা ৮বছৰ পূৰ্বে ক্ৰিকেটৰ পৰা অৱসৰ লৈছিল মাষ্টাৰ ব্লাষ্টাৰ শচীন তেণ্ডুলকাৰে। এশটা শতকীয় ইনিংছেৰে বিৰল অভিলেখ গঢ়িবলৈ সক্ষম হোৱা মহাতাৰকা গৰাকীয়ে সময়ে সময়ে বাতৰিৰ শিৰোনাম দখল কৰি আহিছে। আকৰ্ষণীয় ব্যক্তিত্ব, মাৰ্জিত আচৰণ আৰু স্বভাৱসুলভ হাঁহিটোৰ বাবে শচীনৰ প্ৰতি মানুহৰ মৰম আগৰ দৰেই বৈ আছে-নিৰৱধি। ক্ৰিকেট পিটছত প্ৰতিপক্ষৰ খেলুৱৈক ব্যতিবস্ত কৰা মহাতাৰকা জনলৈ আহিছে আন এক সুখ বাৰ্তা। ভাৰতীয় মহানতাৰকা বেটছমেন শচীন তেণ্ডুলকাৰক ২০২১ চনৰ ইংলেণ্ডৰ এটা জৰীপ প্ৰতিষ্ঠানৰ জৰীপত বিশ্বৰ আটাইতকৈ প্ৰশংসিত আৰু সন্মানীয় পুৰুষসকলৰ ভিতৰত দ্বাদশ স্থান দিয়া হৈছে।

অৱশ্যে, আটাইতকৈ প্ৰভাৱশালী খেলুৱৈ হিচাপে শচীনৰ স্থান তৃতীয়। আৰ্জেণ্টিনাৰ ছুপাৰষ্টাৰ লিঅ’নেল মেছী আৰু পৰ্তুগালৰ তাৰকা ফুটবলাৰ ক্ৰিষ্টিয়ানো ৰোনাল্ডো ক্ৰমান্বয়ে প্ৰথম আৰু দ্বিতীয় স্থানত আছে। উল্লেখ্য যে, আমেৰিকা যুক্তৰাষ্ট্ৰৰ প্ৰাক্তন ৰাষ্ট্ৰপতি বাৰাক অ’বামাই তালিকাৰ শীৰ্ষস্থান দখল কৰিছে। মাইক্ৰ’ছ’ফ্টৰ প্ৰতিষ্ঠাপক বিল গেটছ আছে তালিকাৰ দ্বিতীয় স্থানত। আনহাতে, চীনৰ ৰাষ্ট্ৰপতি জিনপিঙে বিগত বৰ্ষৰ দৰে এইবাৰো তালিকাৰ তৃতীয় স্থানত আছে। তেনেদৰে, লিঅ’নেল মেছী তালিকাৰ সপ্তম আৰু ৰোনাল্ডো তালিকাৰ চতুৰ্থ স্থানত অৱস্থান কৰিছে।
স্মৰ্তব্য যে, বিগত বৰ্ষৰ জৰীপৰ শীৰ্ষ-২০ত নাছিল শচীনৰ নাম। কিন্তু চলিত বৰ্ষৰ অন্তত তালিকাৰ শীৰ্ষ ৫জনৰ ভিতৰত আমেৰিকাৰ ধনাঢ্য ব্যক্তি ৱাৰেন বাফেটৰ পাছতে আছে শচীনৰ নাম। এই জৰীপত বিগ-বি অমিতাভ বচ্চন আৰু শ্বাহৰুখ খানকো অতিক্ৰম কৰিছে ক্ৰিকেটৰ ভগৱানে।