শ্ব’ৰিয়া আইনত অটল তালিবান! আফগানিস্তান দখলৰ পাছত প্ৰথমবাৰৰ বাবে ৰাজহুৱাভাৱে মৃত্যুদণ্ড দিলে এজন লোকক

ডিজিটেল ডেস্কঃ ২০২১ চনৰ ১৫ আগষ্টত দ্বিতীয়বাৰৰ বাবে আফগানিস্তান দখল কৰাৰ পিছত প্ৰথমবাৰৰ বাবে তালিবান প্ৰশাসনে নিজৰ বৰ্বৰতা প্ৰদৰ্শন কৰিলে। ৰাজহুৱাভাৱে মৃত্যুদণ্ড প্ৰদান কৰিলে হত্যাৰ অভিযোগত অভিযুক্ত এগৰাকী লোকক।

তালিবানৰ মুখপাত্ৰ জাবিহুল্লাহ মুজাহিদে জনায় যে মৃত্যুদণ্ডেৰে দণ্ডিত লোকজন পশ্চিম আফগানিস্তানৰ ফাৰাহ প্ৰদেশৰ বাসিন্দা। লোকজনৰ নাম তাজমিৰ। তেওঁৰ বিৰুদ্ধে ২০১৭ চনত এজন লোকক চুৰিকাঘাত কৰি হত্যা কৰাৰ অভিযোগ আছিল।

মৃত্যুদণ্ড দিয়াৰ সময়ত স্থানীয় তালিবান নেতৃত্ব উপস্থিত আছিল বুলি জানিব পৰা গৈছে।

উল্লেখ্য যে ১৯৯০ ৰ দশকত যেতিয়া তালিবানে প্ৰথমবাৰৰ বাবে আফগানিস্তানত ক্ষমতা দখল কৰিছিল, তেতিয়াও অপৰাধীক ৰাজহুৱাভাৱে শাস্তি দিয়া হৈছিল। কিন্তু ২০২১ চনত আফগানিস্তান দখলৰ পাছত তালিবানে কৈছিল যে এইবাৰ তেওঁলোকৰ শাসনপদ্ধতি পৃথক হ’ব। কিন্তু তাৰপাছতো এইদৰে ৰাজহুৱাকৈ মৃত্যুদণ্ড প্ৰদান কৰাক লৈ ব্যাপক প্ৰতিক্ৰিয়া চলিছে।

মূলতঃ তালিবানে শ্ব’ৰিয়া আইনমতেই আফগানিস্তান শাসন কৰিব, এই মৃত্যুদণ্ডৰ দ্বাৰা সেয়াই বাৰ্তা দিছে বুলি পৰ্যবেক্ষকসকলে জনাইছে।