ডিজিটেল ডেস্কঃ এছিয়াডত আজি স্বৰ্ণপদকৰ লক্ষ্যৰে অৱতীৰ্ণ হ’ব লৌহকন্যা লাভলীনা বৰগোহাঁই৷আজি এছিয়ান গেমছৰ মিডলৱেট শাখাৰ (৭৫ কেজি) ফাইনেলত চীনৰ লী কিয়ানৰ বিৰুদ্ধে অৱতীৰ্ণ হ’ব বক্সাৰ লাভলীনা বৰগোহাঁই-এ। এতিয়ালৈকে লাভলীনাই স্থিৰতাৰে যুঁজিছে আৰু মঙলবাৰে থাইলেণ্ডৰ বেইছন মানীকণক ৫-০ত পৰাস্ত কৰি ফাইনেলত প্ৰৱেশ কৰিছে পেৰিছ অলিম্পিকৰ যোগ্যতাও নিশ্চিত কৰিছে।
চলিত বৰ্ষতে মাৰ্চ মাহত বিশ্ব চেম্পিয়নশ্বিপৰ ছেমি ফাইনেলত লাভলীনাই কিয়ানক কৌশলগত পদ্ধতিৰে স্তম্ভিত কৰি তুলিছিল। হাংঝৌত ইয়াৰ সম্পূৰ্ণ বিপৰীত হ’ব আৰু এইবাৰ কিয়ানে ঘৰতে প্ৰতিশোধৰ পূৰ্ণ চেষ্টা চলাব। চীনা বক্সাৰগৰাকীয়ে দুটা অলিম্পিক আৰু তিনিটা বিশ্ব চেম্পিয়নশ্বিপৰ পদক লাভ কৰা এজন ভয়ংকৰ মিডলৱেট যুঁজাৰু।
উল্লেখ্য যে ছেমি ফাইনেলত লাভলীনাৰ ষ্ট্ৰেইট পাঞ্চে প্ৰথম ৰাউণ্ডত বেছিভাগ স্ক’ৰ কৰিছিল আৰু যেতিয়া মানিকনে দ্বিতীয় ৰাউণ্ডত ঘূৰি আহিবলৈ বিচাৰিছিল, তেতিয়া লাভলীনাই ডিফেণ্ড কৰিছিল। ইপিনে বুধবাৰে পাৰবীন হুডাই (৫৭ কেজি)ও প্ৰতিযোগিতাত অংশগ্ৰহণ কৰিব, ছেমি ফাইনেলত চীনা টাইপেইৰ টু টিং লিঙৰ বিৰুদ্ধে।
Continue Reading
