সৰ্বোচ্চ ন্যায়ালয়ৰ মুখ্য ন্যায়াধীশ আৰু অমিত শ্বাহৰ মাজত চলিছে নেকি মতবিৰোধ? স্বাধীনতা দিৱসৰ দিনা পোহৰলৈ আহিছে বিশেষ ভিডিঅ’

১১ ছেকেণ্ডৰ এটা ভিডিঅ’ শ্বেয়াৰ কৰি এএনআইয়ে কয় যে লালকিল্লাত স্বাধীনতা দিৱস উদযাপনৰ সময়ত চিজেআই ডি ৱাই চন্দ্ৰচুড় আৰু কেন্দ্ৰীয় গৃহমন্ত্ৰী অমিত শ্বাহে ইজনে সিজনক সম্ভাষণ জনায়।

এই ভিডিঅ’টোৰ পৰা এক বা দুছেকেণ্ড কাটি এটা সুকীয়া ভিডিঅ’ তৈয়াৰ কৰা হৈছিল, যিটো ভিডিঅ’ বহু ব্যৱহাৰকাৰীয়ে বিভিন্ন বাৰ্তাৰে শ্বেয়াৰ কৰি আছে। ছ’চিয়েল মিডিয়াত কোৱা হৈছে যে অমিত শ্বাহে চিজেআই চন্দ্ৰচুড়ৰ শুভেচ্ছাৰ কোনো সঁহাৰি নিদি তেওঁক আওকাণ কৰে। 

উল্লেখযোগ্য যে অমিত শ্বাহে পত্নী সোনল শ্বাহৰ সৈতে লালকিল্লাৰ অনুষ্ঠানত উপস্থিত হৈছিল। ভিডিঅ’টোত দেখা গৈছে যে চি জে আই চন্দ্ৰচুড়ে গৃহমন্ত্ৰী অমিত শ্বাহৰ ফালে আগবাঢ়ি যায়। সেই সময়ত অমিত শ্বাহৰ হাতত এটা খাম আছিল। অমিত শ্বাহে সেই খামটো খালী চকী এখনত থৈ ​​চি জে আই চন্দ্ৰচুড়ক সম্ভাষণ জনাই হাত মিলাইছে। ইয়াৰ পাছত তেওঁ পাছলৈ ঘূৰি যায়। এই সময়ত চন্দ্ৰচুড়ে অমিত শ্বাহৰ লগত অহা পত্নী সোণাল শ্বাহক সম্ভাষণ জনায়। এই শুভেচ্ছা গৃহমন্ত্ৰীৰ পত্নীৰ বাবে আছিল অমিত শ্বাহৰ বাবে নহয়। চি জে আইৰ শুভেচ্ছাৰ উত্তৰ দিলে অমিত শ্বাহৰ পত্নীয়ে। এইখিনিতে ছ’চিয়েল মিডিয়াৰ “পণ্ডিতসকলে” নিজৰ শিল্পকলা প্ৰদৰ্শন কৰিলে। শেষৰ দুটা চেকেণ্ড কাটি পেলোৱাৰ ফলত দেখা গ’ল যে অমিত শ্বাহে চি জে আইৰ শুভেচ্ছাৰ প্ৰতি কোনো সঁহাৰি নিদি তেওঁক আওকাণ কৰে।