টাইটানিক'ৰ অভিনেতা বাৰ্ণাৰ্ড হিলৰ মৃত্যু, বিশ্বৰ সাংস্কৃতিক মহলত শোক

স্কটিছ লোক সংগীতজ্ঞ বাৰবাৰা ডিক্সনে এক্স হেণ্ডেলত বাৰ্ণাৰ্ডৰ মৃত্যুৰ খবৰ ৰাজহুৱা কৰে। বাৰবাৰা ডিক্সনে লিখিছে "অতি দুখৰ সৈতে আমি ঘোষণা কৰিছো যে বাৰ্ণাৰ্ড হিলৰ মৃত্যু হৈছে।  আমি একেলগে 'জন পল জৰ্জ ৰিঙ্গো এণ্ড বাৰ্ট' কৰিছিলো, 'দ্য উইলি ৰাছেল মাৰ্ভেলচ শ্ব' কৰিছিলো। সঁচাকৈয়ে এজন অনবদ্য অভিনেতা আছিল তেওঁ। তেওঁক লগ পোৱাটো সঁচাকৈয়ে আনন্দদায়ক কথা আছিল। শান্তিত থাকক, বেনি, বাৰ্ণাৰ্ড হিল। "

মৃত্যুৰ সময়ত বাৰ্ণাৰ্ড হিলৰ বয়স আছিল ৭৯ বছৰ।  বাৰ্ণাৰ্ড হিলৰ জন্ম ইংলেণ্ডৰ মানচেষ্টাৰত হৈছিল। বিবিচি টিভিৰ জনপ্ৰিয় নাটক 'বয়জ ফ্ৰম দ্য ব্লেকষ্টাফ'ত ইয়োচাৰ হিউজেছৰ চৰিত্ৰত অভিনয় কৰাৰ পিছৰে পৰা পিছলৈ ঘূৰি চাবলগীয়া হোৱা নাছিল তেওঁ । ১৯৯৭ চনত তেওঁ জেমছ কেমেৰুনৰ টাইটানিকত কেপ্টেইন এডৱাৰ্ড স্মিথৰ চৰিত্ৰত অভিনয় কৰে। কেপ্টেইন হিচাপে কৰা তেওঁৰ অভিনয়ে সেই ঐতিহাসিক চৰিত্ৰটোত এক বেলেগ মাত্ৰা প্ৰদান  কৰিছিল। একেদৰে বাৰ্ণাৰ্ড হিলে পিটাৰ জেকচনৰ 'দ্য লৰ্ড অফ দ্য ৰিংছ' ত্ৰিলজীত অভিনয় কৰিছিল। হিলক ৰোহনৰ ৰজা থিওডেনৰ চৰিত্ৰত অভিনয় কৰা দেখা গৈছিল। বাৰ্ণাৰ্ড হিলে তেওঁৰ দীঘলীয়া কেৰিয়াৰত অতি দক্ষতাৰে বিভিন্ন ধৰণৰ ছবিত অভিনয় কৰিছে। তেওঁৰ মৃত্যুৱে হলিউডৰ লগতে সমগ্ৰ বিশ্বতে শোকৰ ছাঁ পেলাইছে।