ডিজিটেল ডেস্কঃ তাজমহল কৰ্তৃপক্ষলৈ ১ কোটি টকাৰ সম্পত্তি কৰ পৰিশোধ কৰাৰ বাবে জাননী প্ৰেৰণ কৰা হৈছে। আগ্ৰা পৌৰ নিগমে জাৰি কৰা জাননীত অতি সোনকালে এই কৰ পৰিশোধ কৰিবলৈ নিৰ্দেশ দিয়া হৈছে। তাজমহল কৰ্তৃপক্ষলৈ প্ৰেৰণ কৰা বকেয়া বিলসমূহ ২০২১-২২ আৰু ২০২২-২৩ বিত্তীয় বৰ্ষৰ বুলি জানিব পৰা গৈছে। কেৱল সেয়াই নহয় পৌৰ নিগমে এইবুলিও সতৰ্ক কৰি দিছে যে যদি ১৫ দিনৰ ভিতৰত কৰ পৰিশোধ কৰা নহয়, তেন্তে তাজমহল 'জব্দ' কৰা হ'ব।
তাজমহলৰ তত্বাৱধানত থকা ভাৰতীয় জৰীপ (এএছআই)য়ে এনে জাননী লাভ কৰি আচৰিত হৈছে। তাজমহলৰ ৩৭০ বছৰীয়া ইতিহাসত প্ৰথমবাৰৰ বাবে কৰ পৰিশোধ কৰিবলৈ জাননী জাৰি কৰা হৈছে।
এ.এছ.আই.-য়ে ধাৰণা কৰা মতে হয়তো ভুলবশতঃ জাননী খন প্ৰেৰণ কৰা হৈছে।এএছআইৰ জ্যেষ্ঠ বিষয়া ৰাজকুমাৰ পেটেলে কয় যে তেওঁলোকক কৰ পৰিশোধ কৰিবলৈ তাজমহল আৰু আগ্ৰা দুৰ্গলৈ তিনিখন জাননী প্ৰেৰণ কৰা হৈছে।
যাৰ পৰিমাণ ১ কোটিতকৈও অধিক টকা হ’ব । পেটেলে কয়, "আমি ভাবো এনে ধৰণৰ জাননী ভুলবশতঃ প্ৰেৰণ কৰা হৈছে। কৰবাত কিবা ভুল হৈছিল। প্ৰথমতে, কোনো স্মাৰকৰ ক্ষেত্ৰত সম্পত্তি কৰ প্ৰযোজ্য নহয়। উত্তৰ প্ৰদেশকে ধৰি দেশৰ অন্যান্য ৰাজ্যৰ আইনত ইয়াক উল্লেখ কৰা হৈছে। "
Continue Reading
