ডিজিটেল ডেস্কঃ তেলেংগানাৰ মুখ্যমন্ত্ৰী কেচিআৰৰ দল বিআৰএছক এক মোক্ষম আঘাত৷ সোমবাৰ অৰ্থাৎ ২৬ জুনত কংগ্ৰেছত যোগদান কৰে প্ৰাক্তন সাংসদ পংগুলেটি শ্ৰীনিবাস ৰেড্ডী, তেলেংগানাৰ প্ৰাক্তন মন্ত্ৰী জুপল্লী কৃষ্ণ ৰাওকে ধৰি দহজন নেতাই। কংগ্ৰেছৰ সভাপতি মল্লিকাৰ্জুন খৰ্গে আৰু ৰাহুল গান্ধীৰ উপস্থিতিত এই নেতাসকলে কংগ্ৰেছত যোগদান কৰে৷
এই সময়ত কংগ্ৰেছৰ সাধাৰণ সম্পাদক কে চি বেণুগোপাল, দলটোৰ তেলেংগানাৰ ভাৰপ্ৰাপ্ত মণিকৰাও থাকৰে আৰু প্ৰদেশ কংগ্ৰেছ কমিটীৰ সভাপতি ৰেৱন্ত ৰেড্ডী উপস্থিত থাকে। মল্লিকাৰ্জুন খৰ্গে আৰু ৰাহুল গান্ধীয়েও এআইচিচিৰ কাৰ্যালয়ত তেলেংগানা কংগ্ৰেছৰ নেতাসকলক সাক্ষাৎ কৰে। দলৰ নতুন নেতাসকলক আদৰণি জনাই ৰাহুল গান্ধীয়ে কয় যে কংগ্ৰেছ দলে ভয়-ভাবুকিৰ ৰাজনীতি আৰু প্ৰতিশোধৰ ৰাজনীতিত ভয় নকৰে।
সদ্যতে কংগ্ৰেছত যোগদান কৰা পংগুলেতি শ্ৰীনিবাস ৰেড্ডী খাম্মাম লোকসভা আসনৰ প্ৰাক্তন সাংসদ। ৱাই এছ আৰ কংগ্ৰেছৰ পৰা ৰেড্ডীয়ে লোকসভা নিৰ্বাচনত জয়লাভ কৰে। ইয়াৰ পিছত তেওঁ কেচিআৰৰ দলত যোগদান কৰে। তেলেংগানাৰ কে. চন্দ্ৰশেখৰ ৰাও চৰকাৰৰ গ্ৰামোন্নয়ন মন্ত্ৰী হিচাপে কাৰ্যনিৰ্বাহ কৰি আছিল৷ এই দুয়োগৰাকী নেতাক কিছু মাহ পূৰ্বে দল বিৰোধী কাৰ্যকলাপৰ অভিযোগত ভাৰত ৰাষ্ট্ৰ সমিতিৰ পৰা নিলম্বন কৰা হৈছিল।এই দুগৰাকী নেতাৰ বাহিৰেও কংগ্ৰেছত যোগদান কৰিছে এম এল চি দামোদৰ ৰেড্ডী, প্ৰাক্তন বিধায়ককে ধৰি প্ৰায় ডেৰ ডজন নেতাই।
Continue Reading
