ডিজিটেল ডেস্কঃ বিদেশৰ কেইবাখনো ৰাষ্ট্ৰৰ সৈতে সহযোগিতা বৃদ্ধিৰ লক্ষ্যৰে প্ৰধানমন্ত্ৰী নৰেন্দ্ৰ মোদীয়ে শুকুৰবাৰৰ পৰা তিনিখন দেশৰ ভ্ৰমণ আৰম্ভ কৰিছে৷ এই তিনিও খন দেশক সামৰি মোদীয়ে ৪০ টাতকৈও অধিক কাৰ্যসূচীত অংশগ্ৰহণ কৰিব৷ প্ৰধানমন্ত্ৰীৰ কাৰ্যালয়ে প্ৰকাশ কৰা অনুসৰি তেওঁ তিনিখন দেশ- জাপান, পাপুৱা নিউ গিনি আৰু অষ্ট্ৰেলিয়া ভ্ৰমণৰ বাবে ওলাইছে৷
এই সময়ছোৱাত মোদীয়ে দুই ডজনতকৈও অধিক নেতাক সাক্ষাৎ কৰিব বুলি আশা কৰা হৈছে৷ প্ৰধানমন্ত্ৰী মোদীয়ে জাপানৰ হিৰোছিমাত অনুষ্ঠিত জি-৭ গোটৰ সন্মিলনতো অংশগ্ৰহণ কৰিব আৰু তাৰ পিছত তেওঁ ভাৰত-প্ৰশান্ত মহাসাগৰীয় দ্বীপপুঞ্জ সহযোগিতা মঞ্চৰ তৃতীয় সন্মিলনত অংশগ্ৰহণ কৰিব ৷ জি-৭ সন্মিলনৰ অধিৱেশন ২০ মে' আৰু ২১ মে'ত অনুষ্ঠিত হ'ব৷ প্ৰধানমন্ত্ৰী মোদীৰ এই বিদেশ ভ্ৰমণ কাৰ্যসূচীৰ বিষয়ে বৈদেশিক সচিব বিনয় কোৱাট্ৰাই বিবৃতি প্ৰকাশ কৰিছে।
জি-৭ সন্মিলনৰ ২০ মে’ৰ অধিৱেশনত খাদ্য, স্বাস্থ্য, বিকাশ আৰু লিংগ সমতাৰ বিষয়ে আলোচনা কৰা হ’ব। পৰৱৰ্তী অধিৱেশনত জলবায়ু, শক্তি আৰু পৰিৱেশৰ বিষয়ত , আৰু তৃতীয় অধিৱেশনত শান্তি, স্থিৰতা আৰু সমৃদ্ধ বিশ্বৰ বিষয়ত আলোচনা হ’ব৷ প্ৰধানমন্ত্ৰী মোদীয়ে ভ্ৰমণ কৰিবলগীয়া দেশ কেইখন হৈছে
পাপুৱা নিউগিনি
প্ৰধানমন্ত্ৰীয়ে ২২ মে'ত তেওঁৰ পাপুৱা নিউগিনিৰ প্ৰধানমন্ত্ৰী জেমছ মাৰেপৰ সৈতে আলোচনা কৰিব৷ পাপুৱা নিউ গিনিত প্ৰধানমন্ত্ৰীয়ে পিছদিনা প্ৰশান্ত মহাসাগৰীয় দ্বীপ দেশখনৰ গভৰ্ণৰ জেনেৰেলৰ সৈতেও বৈঠকত মিলিত হ’ব৷
জি-৭ সন্মিলন, জাপান
তিনিখন দেশৰ ভ্ৰমণকালত প্ৰধানমন্ত্ৰী মোদীয়ে জাপানৰ হিৰোছিমাত অনুষ্ঠিত জি-৭ বা সাতখন দেশৰ গোটৰ সন্মিলনত অংশগ্ৰহণ কৰিব আৰু তাৰ পিছত তেওঁ ভাৰত-প্ৰশান্ত মহাসাগৰীয় দ্বীপপুঞ্জ সহযোগিতা মঞ্চৰ (এফআইপিআইচি সন্মিলন) তৃতীয় সন্মিলনত সহ-সভাপতিত্ব কৰিব।
অষ্ট্ৰেলিয়া
প্ৰধানমন্ত্ৰী মোদীয়ে দেশ খনৰ নেতা, গুৰুত্বপূৰ্ণ ব্যক্তিত্ব, পণ্ডিত আৰু ভাৰতীয় সম্প্ৰদায়ৰ সদস্যসকলক সাক্ষাৎ কৰিব। তেওঁৰ অষ্ট্ৰেলিয়া ভ্ৰমণকালত প্ৰধানমন্ত্ৰীয়ে বহুলোকক সম্বোধন কৰিব ৷অষ্ট্ৰেলিয়াত প্ৰধানমন্ত্ৰী মোদীয়ে চিডনীত থকা প্ৰবাসী ভাৰতীয়সকলৰ সভাত ভাগ ল’ব৷
Continue Reading
