ডিজিটেল ডেস্কঃ চুবুৰীয়া ৰাজ্য ত্ৰিপুৰাত লাখ টকাৰ গাঁজা জব্দ৷ মাদক দ্ৰব্যৰ বিৰুদ্ধে অভিযান চলাইছিল বিএছএফ, শুল্ক বিভাগ আৰু 'জি আৰ পি'য়ে। পৃথক পৃথক অভিযান চলাই বুজন পৰিমাণৰ গাঁজা জব্দ কৰিছে বিএছএফ আৰু 'জি আৰ পি'য়ে।
আগৰতলাৰ কেন্দ্ৰীয় শুল্ক বিভাগ আৰু বিএছএফে পশ্চিম ত্ৰিপুৰা জিলাৰ পৰা জব্দ কৰে বুজণ পৰিমাণৰ গাঁজা। মোহনপুৰ মহকুমাৰ ছিধাই থানাৰ অন্তৰ্গত জলাইবাৰীৰ এটা বাসগৃহত যৌথ অভিযান চলাই গাঁজা জব্দ কৰে অভিযানকাৰী দলটোৱে। জব্দ কৰা এই বুজন পৰিমাণৰ গাঁজাখিনিৰ মূল্য প্ৰায় ৩৩ লাখ টকা। ওজন আছিল ২২০ কেজি৷
আন এক অভিযানত পশ্চিম ত্ৰিপুৰাৰ বগাবিলৰ পৰাও গাঞ্জা জব্দ কৰে বিএছএফ আৰু শুল্ক বিভাগে। জব্দ কৰা এই গাঁজাখিনিৰ মূল্য প্ৰায় ১০ লাখ টকা বুলি সদৰি কৰিছে বিএছএফে। ইয়াৰ ওজন ২০ কেজি৷
ইফালে, আগৰতলা ৰে'লষ্টেচনত নিয়মীয়া তালাচী চলোৱা সময়ত জিআৰপি য়ে ৪০ কেজি গাঁজা জব্দ কৰে। ৰেলেৰে বহিঃৰাজ্যলৈ সৰবৰাহৰ বাবে গাঁজাখিনি ষ্টেচনলৈ অনা হৈছিল যদিও ইয়াৰ পূৰ্বেই গৰাকীবিহীন গাঁজাখিনি জব্দ কৰিবলৈ সক্ষম হয় কৰ্তব্যৰত জিআৰপিয়ে।
Continue Reading
