পাকিস্তানৰ মৰসাহ! জলপথেৰে ভাৰতত প্ৰৱেশৰ চেষ্টা, কি ব্যৱস্থা ল’লে ভাৰতে ?

নতুন দিল্লীঃ সীমান্তত পুনৰ সমস্যা। এইবাৰ জলপথত লাগিছে কন্দল। কোটি কোটি টকাৰ মাদকদ্ৰব্য সৰবৰাহকাৰী এখন নাও ভাৰতত প্ৰৱেশ কৰিবলৈ চেষ্টা কৰোতেই জব্দ এখন পাকিস্তানী নাও। গুজৰাট উপকূলৰ পৰা ভাৰতীয় জলসীমাত ৬জন ক্ৰু সদস্যৰ সৈতে এখন পাকিস্তানী মাছ মৰা নাও 'আল হুছেইনী' জব্দ কৰা বুলি সদৰী কৰিছে প্ৰতিৰক্ষা মন্ত্ৰণালয়ৰ জনসম্পৰ্ক কাৰ্যালয়ে। তাৰ পৰা প্ৰায় ৪০০ কোটি টকাৰ প্ৰায় ৭৭ কিলোগ্ৰাম হিৰোইন উদ্ধাৰ কৰা হৈছে। জানিবলৈ পোৱা মতে, এক গোপন সূত্ৰৰ জৰিয়তে ভাৰতীয় উপকূলৰক্ষী বাহিনীয়ে গুজৰাটৰ সন্ত্ৰাসবাদ বিৰোধী দলৰ সৈতে এক যুটীয়া অভিযান চলায়।

গুজৰাটৰ পিআৰ ডিফেন্সে এক টুইটযোগে কয়, ‘ভাৰতীয় উপকূলৰক্ষী বাহিনী, গুজৰাট সন্ত্ৰাসবাদ বিৰোধী দলৰ এক যুটীয়া অভিযানত প্ৰায় ৪০০ কোটি মূল্যৰ ৭৭ কিলোগ্ৰাম হিৰোইন কঢ়িয়াই অনা পাকিস্তানী মাছ ধৰা নাওঁ ভাৰতীয় জলসীমাত ৬জন কৰ্মচাৰীৰ সৈতে 'আল হুছেইনী'ক জব্দ কৰিছে। ইফালে প্ৰতিৰক্ষা মন্ত্ৰণালয়ে সদৰী কৰামতে, জাহাজখন গুজৰাট সীমান্তলৈ অনা হৈছে। কি উদ্দেশ্যে বৃহৎ পৰিমাণৰ মাদকদ্ৰব্য ভাৰতলৈ অনা হৈছিল তাকে লৈ এতিয়া অব্যাহত আছে অনুসন্ধান।

উল্লেখ্য যে, বিগত ছেপ্টেম্বৰ মাহত এখন জাহাজৰ পৰা দুই কণ্টেইনাৰ ভৰ্তি প্ৰায় ৩,০০০ কিলোগ্ৰাম হিৰোইন জব্দ কৰা হৈছিল। যাৰ বজাৰ মূল্য আছিল প্ৰায় ২০হাজাৰ কোটি টকা। প্ৰতিৰক্ষা বিশেষজ্ঞসকলৰ আশংকা অনুসৰি, আদানি বন্দৰৰ জৰিয়তে পাকিস্তানে ভাৰতত প্ৰৱেশৰ প্ৰচেষ্টা চলাই আহিছে। অৱশ্যে, এতিয়ালৈকে আনুষ্ঠানিকভাৱে চৰকাৰী পক্ষৰ পৰা কোনো ধৰণৰ বাৰ্তা প্ৰেৰণ কৰা হোৱা নাই। উল্লেখ্য যে, সম্প্ৰতি আটকাধীন অভিযুক্তৰ পৰা প্ৰতিৰক্ষা কৰ্মীসকলে তথ্য সংগ্ৰহ কৰিবলৈ চেষ্টা কৰি আছে।