তৃতীয় খেলো ইণ্ডিয়া বিশ্ববিদ্যালয় গেমছত ফেন্সিঙৰ মহিলা দলীয় শাখাত অসম কন্যা ছুমিৰ সোণৰ পদক

 ইফালে, তৃতীয় খেলো ইণ্ডিয়া বিশ্ববিদ্যালয় গেমছত পূৰ্বৰ সকলো অভিলেখ ভংগ কৰি গৌৰৱময় সফলতা লাভ কৰিছে অসমৰ খেলুৱৈয়ে। তাৰকা শ্বুটাৰ হৃদয় হাজৰিকাৰ স্বর্ণজয়ৰে প্ৰতিযোগিতাত অভিযান আৰম্ভ কৰাৰ পাছত আজি অন্তিম দিনাও অসমৰ মহিলা ফেন্সিং খেলুৱৈ ছুমি দত্তই সোণ লাভ কৰি খেলো ইণ্ডিয়া বিশ্ববিদ্যালয় গেমছত ৰাজ্যৰ সাফল্যৰ গৌৰৱ যাত্ৰাৰ সামৰণি কৰে ৷ উল্লেখ্য যে অসমৰ মহিলা ফেন্সিং খেলুৱৈ ছুমিয়ে পঞ্জাৱৰ অমৃতসৰৰ গুৰুনানক দেব বিশ্ববিদ্যালয়ক প্রতিনিধিত্ব কৰি খেলো ইণ্ডিয়া বিশ্ববিদ্যালয় গেমছত অংশ লৈছিল । আজি লক্ষ্ণৌৰ ইকানা স্প'ৰ্টছ চিটীৰ ইনড'ৰ ষ্টেডিয়ামত হোৱা ফেন্সিং প্রতিযোগিতাৰ মহিলাৰ দলীয় ইপী শাখাত সোণ লাভ কৰে অসম কন্যা ছুমিয়ে প্রতিনিধিত্ব কৰা গুৰুনানক দেব বিশ্ববিদ্যালয়ে। আনহাতে, মনিপুৰ বিশ্ববিদ্যালয়ে ৰূপ তথা পঞ্জাৱ বিশ্ববিদ্যালয় আৰু ছৰ্ডাৰ পেটেল বিশ্ববিদ্যালয়ে ব্ৰঞ্জৰ পদক লাভ কৰে। 

অসমৰ তিনিচুকীয়াৰ প্ৰতিভাবান মহিলা ফেন্সিং খেলুৱৈ ছুমিয়ে প্রথমে ডিব্ৰুগড় বিশ্ববিদ্যালয়ৰ হৈ খেলাৰ অগ্ৰহ প্ৰকাশ কৰিছিল যদিও সঁহাৰি নাপালে। সেয়ে পঞ্জাৱৰ অমৃতসৰৰ গুৰুনানক দেব বিশ্ববিদ্যালয়ৰ অনুৰোধত সকলো সুবিধা লাভ কৰি তৃতীয় খেলো ইণ্ডিয়া বিশ্ববিদ্যালয় গেমছত অংশ লয়। তেওঁৰ প্ৰশিক্ষক অনির্বান বেনাৰ্জী। প্ৰনৱ দত্ত আৰু প্ৰনতি দত্তৰ কন্যা ছুমিয়ে তিনিচুকীয়াৰ অনির্বান ফেন্সিং স্প'ৰ্টছ একাডেমীতে প্রশিক্ষণ লৈ আছে। 

ইফালে, তৃতীয় খেলো ইণ্ডিয়া বিশ্ববিদ্যালয় গেমছত পদক তালিকাত শীৰ্ষস্থানত থাকে পঞ্জাৱ বিশ্ববিদ্যালয় দল। বিশ্ববিদ্যালয়খনে ২৬ টা সোণ, ১৭ টা ৰূপ আৰু ২৬ টা ব্ৰঞ্জসহ মুঠ ৬৯ টা পদক লাভ কৰিবলৈ সক্ষম হয়। দ্বিতীয় স্থানত থকা পঞ্জাৱৰ অমৃতসৰৰ গুৰুনানক দেব বিশ্ববিদ্যালয়ে ২৪ টা সোণ, ২৭ টা ৰূপ আৰু ১৭ টা ব্ৰঞ্জ অৰ্জন কৰিবলৈ সক্ষম হয়। ইফালে, ১৬ টা সোণ, ১০ টা ৰূপ আৰু ছটা ব্ৰঞ্জ লাভ কৰি তৃতীয় স্থানত থাকে কৰ্ণাটকৰ জৈন বিশ্ববিদ্যালয়। 

ইফালে, আজি বেনাৰসীত অনুষ্ঠিত হোৱা তৃতীয় খেলো ইণ্ডিয়া বিশ্ববিদ্যালয়ৰ সামৰণি অনুষ্ঠানত মুখ্য অতিথিৰূপে উপস্থিত থাকে কেন্দ্রীয় ক্রীড়া মন্ত্ৰী অনুৰাগ সিং ঠাকুৰ আৰু উত্তৰ প্ৰদেশৰ মুখ্যমন্ত্ৰী আদিত্যনাথ যোগী। সামৰণি অনুষ্ঠানত সাংস্কৃতিক কাৰ্যসূচীৰ লগতে শ্রেষ্ঠ অৰ্জন কৰা বিশ্ববিদ্যালয় আৰু খেলুৱৈক ট্ৰফী প্ৰদান কৰা হয় ৷