ডিজিটেল ডেস্কঃ সৌৰভ গাংগুলী বনাম বিৰাট কোহলী। দুয়োৰে মাজত সংঘাত তুংগত আছে। এইবাৰ সমগ্ৰ বিষয়টোৰ সম্পৰ্কত মুকলিকৈ মন্তব্য কৰিলে ৰবি শাস্ত্ৰীয়ে। পোনপটীয়াকৈ কাৰো নাম নোলোৱাকৈ শাস্ত্ৰীয়ে মন্তব্য কৰে।
শাস্ত্ৰীয়ে এটা ক্ৰিকেট ৱেবছাইটত বিশ্লেষক হিচাপে কাম কৰি আছে। তাত সৌৰভ-কোহলী বিতৰ্কৰ বিষয়ে তেওঁক সোধা হৈছিল। কাৰো নাম নোলোৱাকৈ শাস্ত্ৰীক সোধা হ’ল যে যদি তেওঁ তেনে অৱস্থাত থাকিলে কি কৰিলেহেঁতেন?
ভাৰতৰ প্রাক্তন প্রশিক্ষকগৰাকীয়ে উত্তৰত কয়– ''মোৰ আৰু ক্ৰিকেটাৰজনৰ মাজৰ সম্পৰ্কৰ ওপৰত বহুখিনি নিৰ্ভৰ কৰে। কাৰো লগত যজি কথা পাতিব মন নাযায় তেতিয়া মই মনে মনে আঁতৰি যাওঁ। কিন্তু এটা কথা কব খুজিছোঁ। ঘৰলৈ গৈ দিনটোৰ শেষত জিৰণি লওঁতে এটা কথা সকলোৱে মনত ৰখা উচিত যে এতিয়াও উন্নতিৰ সম্ভাৱনা আছে। বয়স যিমান হ’লেও কথা নাই।”
সমৰ্থকসকলে প্ৰকৃত উত্তৰ বিচাৰি পালে শাস্ত্ৰীৰ এই শেষৰ দুটা কথাত। তেওঁলোকৰ মতে শাস্ত্ৰীয়ে এই মন্তব্যৰ দ্বাৰা সৌৰভকে কটাক্ষ কৰিছে। বিগত সময়ত দুয়োজনৰ মাজৰ সম্পৰ্কক লৈও বহু আলোচনা চলি আহিছে। কোহলীৰ দৰে শাস্ত্ৰীৰ সৈতেও সৌৰভৰ সম্পৰ্ক একেবাৰে ভাল নহয়। আনহাতে কোহলী আৰু শাস্ত্ৰীৰ মাজত বহুত ভাল সম্পৰ্ক আছে।
Continue Reading
