ডিজিটেল ডেস্কঃ অৱশেষত ভাৰতৰ বাবেও আহিল বেয়া খবৰটো৷ তুৰস্কৰ বিধ্বংসী ভূমিকম্পত এতিয়ালৈকে ২৬,০০০ ৰো অধিক লোকে প্ৰাণ হেৰুৱাইছে যদিও কোনো ভাৰতীয় লোকৰ মৃত্যু ঘটাৰ খবৰ অহা নাছিল৷ কিন্তু শেহতীয়াকৈ অহা খবৰ অনুসৰি তুৰস্কত ভূমিকম্পৰ ফলত এজন ভাৰতীয় লোকৰো মৃত্যু ঘটিছে৷ মৃতু ঘটা লোক জনৰ নাম বিজয় কুমাৰ বুলি জানিব পৰা গৈছে৷
শেহতীয়াকৈ লাভ কৰা খবৰ অনুসৰি এখন হোটেলৰ ধ্বংসাৱশেষৰ মাজত বিজয় কুমাৰৰ মৃতদেহ উদ্ধাৰ কৰা হৈছে৷ তুৰস্কত থকা ভাৰতীয় দূতাবাসে প্ৰকাশ কৰা তথ্য অনুসৰি ৬ ফেব্ৰুৱাৰীৰ ভূমিকম্পৰ পিছৰে পৰা বিজয় কুমাৰ সন্ধানহীন হৈ আছিল৷ অৱশেষত আজি বিজয় কুমাৰৰ মৃতদেহ আজি হোটেলৰ ধ্বংসাৱশেষৰ মাজৰ পৰা উদ্ধাৰ কৰা হয়।বেংগালুৰুৰ এটা গেছ-প্লাণ্ট কোম্পানীৰ টেকনিচিয়ান বিজয় কুমাৰে ২৫ জানুৱাৰীত তুৰস্কলৈ গৈছিল আৰু মালতিয়াৰ অৱছাৰ হোষ্টেলত আছিল।
ভাৰতীয় দূতাবাসে মৃত বিজয় কুমাৰৰ মৃতদেহ ভাৰতলৈ প্ৰেৰণ কৰাৰ যাৱতীয় ব্যৱস্থা গ্ৰহণ কৰিব বুলিও জানিব পৰা গৈছে৷ উল্লেখ্য ভূমিকম্পৰ সময়ত তুৰস্কৰ সেই বিশেষ স্থানত ১০ জন ভাৰতীয় লোক থকা বুলি ভাৰতৰ বৈদেশিক দপ্তৰে পূৰ্বেই প্ৰকাশ কৰিছিল৷ ইয়াৰে এজন লোক সন্ধানহীন হৈ থকা বুলিও কোৱা হৈছিল৷ অৱশেষত সন্ধানহীন বিজয় কুমাৰৰ সন্ধান ওলাল মৃত অৱস্থাত৷
Continue Reading
