তুৰস্কত বিধ্বংসী ভূমিকম্পৰ ভৱিষ্যতবাণী কৰিছিল গৱেষক ফ্ৰেংক হুগাৰবিটছে, ভাৰতৰ বিষয়ে তেওঁ কি কৰিছে মন্তব্য?

উল্লেখ্য ফ্ৰেংক হুগাৰবিটছে তুৰস্ক আৰু ছিৰিয়াত ভূমিকম্পই সংহাৰৰ সৃষ্টি কৰাৰ কেইদিনমান আগতে তেনে এটা ভূমিকম্পৰ ভৱিষ্যতবাণী কৰিছিল৷ ভূমিকম্পত ৩০,০০০ ৰো অধিক লোকৰ মৃত্যু হ’ব পাৰে বুলিও ফ্ৰেংক হুগাৰবিটছে  ভৱিষ্যতবাণী কৰিছিল। তেওঁৰ ভৱিষ্যতবাণী সঁচা হোৱাৰ লগে লগে হুগাৰবীটছৰ আন এটা ভিডিঅ' ইণ্টাৰনেটত ভাইৰেল হৈ পৰিছে৷  ভিডিঅ’টোত কোৱা হৈছে যে  ভাৰতীয় উপমহাদেশত এটা ডাঙৰ ভূমিকম্পই সংহাৰৰ সৃষ্টি কৰিব পাৰে আৰু ভাৰত মহাসাগৰ অঞ্চলত (আইঅআৰ) এই ভূমিকম্পই  প্ৰভাৱ পেলাব পাৰে।

ভিডিঅ'টোত তেওঁক ভূমিকম্পৰ প্ৰভাৱৰ বিষয়ে বৰ্ণনা কৰাও দেখা গৈছে৷ তেওঁ বৈজ্ঞানিক সূত্ৰৰ সহায়ত তেনে ভৱিষ্যতবাণী কৰা বুলিও দাবী কৰিছে৷ অৱশ্যে গৱেষকগৰাকীৰ এনে দাবীৰ মাজতে মাৰ্কিন ভূকম্প জৰিপ বিভাগ  ইউএছজিএছে কৈছে যে  ইউএছজিএছ বা আন কোনো বিজ্ঞানীয়ে কেতিয়াও ডাঙৰ ভূমিকম্পৰ ভৱিষ্যতবাণী কৰা নাই।  ইউএছজিএছৰ বিজ্ঞানীসকলে কেৱল এক গুৰুত্বপূৰ্ণ ভূমিকম্প হোৱাৰ সম্ভাৱনা গণনা কৰিব পাৰে (এক নিৰ্দিষ্ট সংখ্যক বছৰৰ ভিতৰত এটা নিৰ্দিষ্ট এলেকাত।) ভূমিকম্পৰ পূৰ্বানুমানত ৩ টা উপাদান নিৰ্ধাৰণ কৰিব লাগিব: ১) তাৰিখ আৰু সময়, ২) অৱস্থান, আৰু ৩) প্ৰাবল্য। কিছুমান লোকে দাবী কৰে  যে তেওঁলোকে ভূমিকম্পৰ পূৰ্বানুমান কৰিব পাৰে, কিন্তু তেওঁলোকৰ মন্তব্য মিছা হোৱাৰ উদাহৰণ বহুত৷কাৰণ  সেইবোৰ বৈজ্ঞানিক প্ৰমাণৰ ওপৰত আধাৰিত নহয় আৰু ভূমিকম্প এক বৈজ্ঞানিক প্ৰক্ৰিয়াৰ অংশহে।