ডিজিটেল ডেস্কঃ আজিকালি বহুতেই যাত্ৰা কৰিবৰ বাবে উবাৰৰ আশ্ৰয় লয়। নিজৰ বাহন বা ৰাজহুৱা পৰিবহন ব্যৱস্থাৰ উপৰিও যাতায়ত কৰিবলৈও মানুহে ওলা আৰু উবাৰ ব্যৱহাৰ কৰে। উবাৰ এপৰ জৰিয়তে বাইকো বুক কৰি যাত্ৰা কৰিব পাৰি। উবাৰত যাত্ৰা কৰাৰ পাছত আপুনি যদি কোটি টকাৰ বিল দেখা পায় আপোনাৰ বাৰু কেনে লাগিব? বেহুঁচ হৈ নপৰিবনে?
এজন যুৱকে উবাৰ বুক কৰাৰ বিল দেখাইছিল ৬২ টকা। যেতিয়া যুৱকজনে গন্তব্যস্থল গৈ পালে তেতিয়া তেওঁ দেখিলে যে ৭ কোটি ৬৬ লাখ ৮৩ হাজাৰ ৭৬২ টকাৰ বিল আহিছে।
এই অদ্ভুত ঘটনা সংঘটিত হৈছে দীপক টেংগুৰিয়া নামৰ এজন যুৱকৰ লগত। নয়ডাৰ বাসিন্দা যুৱকজনে কাৰ্যালয়লৈ যাবলৈ উবাৰ এপৰ পৰা অটো বুকিং কৰিছিল, য’ত ৬২ টকা ভাড়া দেখুৱাইছিল।
কিন্তু নিৰ্দিষ্ট গন্তব্যস্থান পোৱাৰ পিছত যেতিয়া তেওঁ পেমেণ্ট কৰিবলৈ লৈছিল, তেতিয়া তেওঁ দেখিলে যে ভাড়া ৬২ টকা নহয়, এপটোত ভাড়া দেখুওৱা হৈছে ৭,৬৬,৮৩,৭৬২ কোটি টকা।
এই বিল দেখি যুৱকজন স্তম্ভিত হৈ পৰে। দীপক আৰু তেওঁৰ বন্ধু আশীষ মিশ্ৰই এক্স হেণ্ডেলত এটা ভিডিঅ’ পোষ্ট কৰে। ভিডিঅ’টোত আশীষে দীপকক বিলখন দেখুৱাবলৈ কয়। দীপকে মোবাইলত দেখুৱালে যে ৭ কোটি ৬৬ লাখ ৮৩ হাজাৰ ৭৬২ টকীয়া বিল আহিছে।
এই পোষ্টটো ছ’চিয়েল মিডিয়াত এতিয়া ভাইৰেল হৈ আছে। ইয়াৰে ৫ কোটি ৯৯ লাখ ৯ হাজাৰ ১৮৯ টকা ৱেটিং চাৰ্জৰ বাবে আৰু ৭৫ টকা প্ৰমোচন খৰচৰ বাবে লোৱা হৈছে। ইফালে আমোদজনক কথাটো হ’ল যে যাত্ৰী দীপক টেংগুৰিয়াৰ বাবে উবেৰৰ অটো চালকজনে ১ মিনিটো অপেক্ষা কৰিব লগা হোৱা নাছিল। গতিকে ৱেটিং চাৰ্জ লগাৰ কোনো প্ৰশ্নই নুঠে। বহু ব্যৱহাৰকাৰীয়ে ৱেটিং চাৰ্জ দেখি আচৰিত হৈ পৰে যিটোৰ বিল আহিছিল ৫ কোটি ৯৯ লাখ টকা ৯ হাজাৰ ১৮৯ টকা। এজন ব্যৱহাৰকাৰীয়ে লিখিছে যে উবেৰৰ লগত প্ৰায়ে এনেকুৱা হয় যে বুকিং কৰাৰ সময়ত টকাৰ পৰিমাণ বেলেগ এটা দেখুৱায় আৰু যাত্ৰা শেষ হোৱাৰ পাছত বেলেগ কিবা এটা টকাৰ পৰিমাণ দেখায়।
উবেৰেও এই পোষ্টটোৰ উত্তৰ দিছে। উবেৰে লিখিছে- আপুনি সন্মুখীন হোৱা বিপদৰ বাবে আমি দুখী। অনুগ্ৰহ কৰি আমাক কিছু সময় দিয়ক যাতে আমি এই বিষয়টো বিতংভাৱে চাব পাৰো। আমি আপোনাৰ লগত অতি সোনকালে এটা আপডেট লৈ যোগাযোগ কৰিম।
বহুতে ৰগৰ কৰি কয় যে চন্দ্ৰলৈ যাবলৈ চন্দ্ৰযান বুক কৰিলেও হয়তো ইমান খৰচ নহ’ব।
Continue Reading
