উচ্চবৰ্ণৰ অত্যাচাৰ! ২৫০জনকৈ দলিত সম্প্ৰদায়ৰ লোক ধৰ্মান্তৰিত হ’ল বৌদ্ধধৰ্মলৈ, ক’ত?

ডিজিটেল ডেস্কঃ ৰাজস্থানত ২৫০ জন দলিত লোকে বুদ্ধধৰ্মত দীক্ষিত হৈছে। উচ্চবৰ্ণৰ অত্যাচাৰৰ বলি হৈয়ে দলিত লোককেইজনে হিন্দু ধৰ্মৰ পৰা বৌদ্ধ ধৰ্মলৈ ধৰ্মান্তৰিত হৈছে বুলি জানিব পৰা গৈছে।

বাতৰি অনুযায়ী, এই ধৰ্মান্তৰকৰণ ৰাজস্থানৰ বাৰান জিলাৰ ভুলন গাঁৱত সংঘটিত হৈছে। শুক্ৰবাৰে গাওঁখনৰ দলিত লোকসকলে কাষৰে বেটলী নদীত হিন্দু দেৱ দেৱীৰ প্ৰতিমা আৰু ফটোসমূহ উটুৱাই দিয়ে।

ইয়াৰ পূৰ্বে গাওঁখনত আক্ৰোশ ৰেলী নামেৰে এটা প্ৰতিবাদী সমদলো দেখা পোৱা যায়। সমগ্ৰ ঘটনাটোৰ ভিডিঅ’সমূহ সামাজিক মাধ্যমত ভাইৰেল হৈ পৰিছে।

ৰাজ্য চৰকাৰৰ প্ৰতি অসন্তুষ্ট প্ৰকাশ কৰি ধৰ্মান্তিৰত দলিতসকলে অভিযোগ কৰে যে দলিত সম্প্ৰদায়ৰ দুজনকৈ যুৱকক ৫ অক্টোবৰত দূৰ্গা আৰতি কৰি থাকোতে উচ্চবৰ্ণৰ লোকসকলে অত্যাচাৰ কৰিছিল।

যুৱক দুজনৰ নাম ক্ৰমে ৰাজেন্দ্ৰ আৰু ৰামহেট আইৰৱাল বুলি জানিব পৰা গৈছে। আনহাতে তেওঁলোকক অত্যাচাৰ কৰা উচ্চবৰ্ণৰ লোক দুজনৰ নাম ক্ৰমে ৰাহুল শৰ্মা আৰু লালচান্দ লোধা।

তাৰপাছতে গাওঁবাসীয়ে জিলা প্ৰশাসনৰ কাষ চাপে কিন্তু প্ৰশাসনে কোনো ব্যৱস্থা নল’লে। তাৰ ফলস্বৰূপেই তেওঁলোকে হিন্দু ধৰ্ম এৰি বৌদ্ধ ধৰ্ম লৈছে বুলি প্ৰকাশ কৰিছে।