উচ্চতম ন্যায়ালয়ে অসাংবিধানিক আখ্যা দি বাতিল কৰাৰ তিনিদিন পূৰ্বে চৰকাৰে দিছিল ১০,০০০ কোটি টকাৰ নিৰ্বাচনী বণ্ড মুদ্ৰণৰ অনুমতি

এই তথ্যসমূহে  এয়াও প্ৰকাশ কৰে যে এছ.পি.এম.চি.আই.এল.-য়ে ইতিমধ্যে ৮৩৫০ টা মুদ্ৰণ কৰিছিল - আৰু এছ.বি.আই.-লৈ প্ৰেৰণো কৰিছিল। নিৰ্বাচনী বণ্ড আঁচনিখনৰ আৰম্ভণিৰ পৰা সৰ্বাধিক ২২,২১৭  টা নিৰ্বাচনী বণ্ড মুকলি কৰা হৈছিল।   এছ.বি.আই.-ৰ লেনদেন বেঙ্কিং বিভাগৰ সহকাৰী মহাপ্ৰৱন্ধকে লিখিছিল: "আমি স্বীকাৰ কৰিছো  মুঠ ৮৩৫০ টা  বণ্ড মুদ্ৰণ কৰা হৈছিল আৰু উচ্চতম ন্যায়ালয়ে দিয়া ৰায়ৰ পৰিপ্ৰেক্ষিতত আমি বাকী ১,৬৫০  টা নিৰ্বাচনী বণ্ড মুদ্ৰণৰ ওপৰত স্থগিতাদেশ দিবলৈ অনুৰোধ জনাইছো" । 

 উল্লেখ্য  দেশৰ সাতটা বিৰোধী দলে একেলগে মুঠ ৬,১৮৬ কোটি টকাৰ  নিৰ্বাচনী বণ্ড সংগ্ৰহ কৰিছিল। কিন্তু ইয়াৰ বিপৰীতে  কেৱল বিজেপিয়ে  ৬,৯৮৬.৫ কোটি টকা নিৰ্বাচনী বণ্ডৰ নামত সংগ্ৰহ কৰিছিল।  নিৰ্বাচন আয়োগে দেওবাৰে নিৰ্বাচনী বণ্ডৰ পৰা কোনো এটা  দলে কিমান টকা উপাৰ্জন কৰিছিল তাৰ তথ্য প্ৰকাশ কৰিছে।নিৰ্বাচন আয়োগে  এক বিবৃতিত কৈছিল   যে ৰাজনৈতিক দলসমূহে উচ্চতম ন্যায়ালয়ৰ অন্তৱৰ্তীকালীন আদেশ অনুসৰণ কৰি নিৰ্বাচনী বণ্ডৰ তথ্য দাখিল কৰিছে। এই তথ্য    আয়োগৰ অফিচিয়েল ৱেবছাইটত আপলোড কৰা হয়। ৱেবচাইটত  ৰাজনৈতিক দলৰ দ্বাৰা জাৰি কৰা নিৰ্বাচনী বণ্ডৰ তথ্য, তাৰিখ আৰু বণ্ডৰ পৰিমাণৰ কথা উল্লেখ আছে । 

 ভাৰতীয় ষ্টেট বেঙ্কৰ (এছ.বি.আই.) কোনটো শাখাত বণ্ডবোৰ আছিল, ক্ৰয়ৰ তাৰিখ আৰু সেইবোৰ ৰাজনৈতিক দলবোৰে লাভ  কৰাৰ তাৰিখ আদিও উল্লেখ কৰা হৈছে। এই বণ্ডবোৰৰ জৰিয়তে কোনটো দলে কিমান টকা লাভ কৰিছে? বিজেপিয়ে বণ্ডৰ পৰা সৰ্বাধিক উপাৰ্জন কৰিছে। ৬,৯৮৬.৫ কোটি টকা গেৰুৱা শিবিৰৰ ভাণ্ডাৰলৈ গৈছে। তালিকাখনত তৃণমূল কংগ্ৰেছ (১,৩৯৭ কোটি টকা), কংগ্ৰেছ (১,৩৩৪ কোটি টকা) , ওড়িশাৰ  শাসনাধিষ্ঠ বিজেডি (৯৪৪.৫ কোটি টকা), তামিলনাডুৰ ডিএমকে (৬৫৬.৫ কোটি টকা) আৰু অন্ধ্ৰ প্ৰদেশৰ ৱাইএছআৰ কংগ্ৰেছ (৪৪২.৮ টকা) উপাৰ্জন কৰাৰ তথ্য  অন্তৰ্ভুক্ত হৈ  আছে। জেডিএছে লাভ কৰা ৮৯.৭৫  কোটি টকাৰ ভিতৰত, মেঘা ইঞ্জিনিয়াৰিঙে  ৫০  কোটি টকা পৰিশোধ কৰিছিল। প্ৰতিষ্ঠানটো নিৰ্বাচনী বণ্ড ক্ৰয় কৰাত দ্বিতীয় স্থানত আছে।  ডিএমকেৰ ৩৭ শতাংশ নিৰ্বাচনী বণ্ডৰ  অনুদান ফিউচাৰ গেমিঙৰ পৰা আহিছিল।