ডিজিটেল ডেস্কঃ দেশৰ উচ্চতম ন্যায়ালয়ত পুনৰ কোভিডে ত্ৰাসৰ সৃষ্টি কৰিছে৷ জানিব পৰা মতে শীৰ্ষ ন্যায়ালয় খনৰ কমেও পাঁচগৰাকী ন্যায়াধীশ কোভিডত আক্ৰান্ত হৈছে। কোভিড আক্ৰান্ত ন্যায়াধীশসকলৰ ভিতৰত আছে ন্যায়াধীশ ৰবীন্দ্ৰ এছ ভাট, সঞ্জীৱ খান্না, অনিৰুদ্ধ বসু, জে বি পাৰ্দিৱালা আৰু মনোজ মিশ্ৰ ৷ আন এগৰাকী বিচাৰক সূৰ্য কান্ত যোৱা সপ্তাহত কোভিডৰ পৰা আৰোগ্য হৈছে।
ন্যায়াধীশ ৰবীন্দ্ৰ ভাটে শেহতীয়াকৈ সমকামী বিবাহ গোচৰত সংবিধান বিচাৰপীঠত শুনানি গ্ৰহণ কৰাৰ কথা আছিল। উল্লেখ্য বৃহস্পতিবাৰৰ লৈকে সমকামী গোচৰটোৰ শুনানি হৈ আছিল। ন্যায়াধীশ ভাট সেই শুনানিত আন ন্যায়াধীশসকলৰ সৈতে একেলগে বহিছিল। স্বাভাৱিকতে সেয়ে আন ন্যায়াধীশসকলেও এতিয়া কোভিডত সংক্ৰমিত হোৱাৰ আশংকাত ভুগিছে৷
একেসময়তে পাঁচজন ন্যায়াধীশৰ কোভিড-১৯ পৰীক্ষা ইতিবাচক হোৱাত কেইবাটাও গোচৰৰ শুনানি পলম হোৱাৰ আশংকাই দেখা দিছে। কেইবাটাও গোচৰৰ শুনানি স্থগিত ৰখা হৈছে।ডিএ গোচৰৰ দৰে গুৰুত্বপূৰ্ণ গোচৰবোৰৰ শুনানিও পিছুৱাই দিয়া হৈছে।
মুখ্য ন্যায়াধীশ ডি চন্দ্ৰচূড়ে কেইদিনমান আগতে কৈছিল যে অধিবক্তাসকলে বিচাৰিলে ভাৰ্চুৱেল শুনানি অনুষ্ঠিত কৰিব পাৰে। একে সময়তে পাঁচজন ন্যায়াধীশ কৰোনাত ধৰা পৰাৰ পিছত, ন্যায়াধীশ, অধিবক্তা আৰু উচ্চতম ন্যায়ালয়ৰ কৰ্মচাৰীসকলৰ মাজত উদ্বেগ বিয়পি পৰিছে।
Continue Reading
