ডিজিটেল ডেস্কঃ কংগ্ৰেছৰ নেত্ৰী প্ৰিয়ংকা গান্ধী ভাদ্ৰাই ২০২৪ চনৰ লোকসভা নিৰ্বাচনত উত্তৰ প্ৰদেশৰ ফুলপুৰ সমষ্টিৰ পৰা প্ৰতিদ্বন্দিতা কৰিব পাৰে৷ কংগ্ৰেছৰ এক ঘনিষ্ঠ সূত্ৰই এই কথা প্ৰকাশ কৰিছে৷ সূত্ৰটোৰ মতে ফুলপুৰ গান্ধী পৰিয়ালৰ এটা দুৰ্গ৷ কাৰণ জৱাহৰলাল নেহৰুৱে ইয়াৰ পৰাই ১৯৫২, ১৯৫৭ আৰু ১৯৬২ চনত একেৰাহে তিনিটা নিৰ্বাচনত জিকিছিল৷
ফুলপুৰ উত্তৰ প্ৰদেশৰ গান্ধী পৰিয়ালৰ দুৰ্গ বুলি চৰ্চিত তিনিখন আসনৰ ভিতৰৰে এখন৷ বাকী দুখন হৈছে ৰায়বৰেলী আৰু আমেঠি। অৱশ্যে, প্ৰিয়ংকাক কোনটো সমষ্টিৰ পৰা প্ৰাৰ্থিত্ব প্ৰদান কৰা হ'ব সেই বিষয়ে এতিয়াও চূড়ান্ত সিদ্ধান্ত লোৱা হোৱা নাই বুলি সূত্ৰটোৱে কয়৷ এইক্ষেত্ৰত ফুলপুৰৰ সম্ভাৱনাই বেছি বুলিও সূত্ৰটোৱে প্ৰকাশ কৰে৷
আন এটা সূত্ৰই লগতে কৈছে যে কংগ্ৰেছে মধ্য প্ৰদেশৰ জবলপুৰৰ পৰা প্ৰিয়ংকাক টিকট দিব পাৰে, যদিহে দলটোৱে বিধানসভা নিৰ্বাচনত ক্ষমতালৈ আহে।
ইয়াৰ পূৰ্বে, গান্ধী পৰিয়ালে বাৰাণসীৰ পৰা কংগ্ৰেছৰ শক্তিশালী প্ৰাৰ্থীয়ে নিৰ্বাচনত যুঁজ দিব বুলি বাতৰি ওলাইছিল, য'ত প্ৰধানমন্ত্ৰী মোদীয়ে বিগত দুটা নিৰ্বাচনত জয়ী হৈছে। কংগ্ৰেছৰ ৰাজ্যিক গোটৰ মুৰব্বী অজয় ৰায়েও কৈছিল যে তেওঁ বাৰাণসীৰ পৰা প্ৰতিদ্বন্দিতা কৰাৰ সম্ভাৱনা আছে।আনহাতে বাৰনসীৰ পৰা ৰাহুল গান্ধীৰ নামো উচ্চাৰিত হৈছিল৷
Continue Reading
