ডিজিটেল ডেস্ক: অন্ধবিশ্বাসৰ সকৰুণ পৰিণতি দেখা গ’ল উত্তৰ প্ৰদেশৰ ভদোহী জিলাত৷ একবিংশ শতিকাৰ কৃত্ৰিম বুদ্ধিমত্তা পৃথিৱী নিয়ন্ত্ৰণ কৰিবলৈ লোৱা সময়ত উত্তৰ প্ৰদেশৰ এই ঘটনাই জোকাৰি গৈছে সভ্য সমাজক৷ ভদোহী জিলাৰ কৈৰাউনা আৰক্ষী থানাৰ অন্তৰ্গত এটা মন্দিৰত ভূত আঁতৰোৱাৰ অজুহাতত এগৰাকী যুৱতীক এজন ব্যক্তিয়ে উপৰ্যুপৰি ধৰ্ষণ কৰাৰ অভিযোগ উত্থাপিত হৈছে৷ ইতিমধ্যে আৰক্ষীয়ে অভিযুক্তজনক গ্ৰেপ্তাৰ কৰিছে।
ভাদোহীৰ আৰক্ষী অধীক্ষক মীনাক্ষী কাতিয়ানে শনিবাৰে কয় যে মিৰ্জাপুৰৰ এটা পৰিয়াল কিছুদিন পূৰ্বে সীতামাঢ়ী দৰ্শন কৰিবলৈ ভদোহীলৈ আহিছিল, য’ত মতিলালে (৫২) দাবী কৰিছিল যে পৰিয়ালটোৰ ১৮ বছৰীয়া কিশোৰীগৰাকীক ভূতে লম্ভিছে৷
মতিলালে এই ক্ষেত্ৰত এজন বিশেষজ্ঞ বুলি দাবী কৰি তেওঁৰ দেউতাকক আশ্বাস দিছিল যে তেওঁ ভূতটো আঁতৰাই নিব৷ আৰক্ষীয়ে জনোৱা অনুসৰি মতিলালে ৪,০০০ টকা (পূজাৰ সামগ্ৰীৰ বাবে) দাবী কৰিছিল আৰু তেওঁক লগত আনিবলৈ কৈছিল।
বৃহস্পতিবাৰে সন্ধিয়া যেতিয়া ছোৱালীজনী তেওঁৰ দেউতাকৰ সৈতে তাত উপস্থিত হৈছিল, মতিলালে তেওঁৰ দেউতাকক তাত ৰৈ থাকিবলৈ কৈছিল আৰু কিশোৰীগৰাকীক এখন বাইকত দৰৱাচী গাঁৱৰ হনুমান মন্দিৰৰ পিছফালে থকা এটা কোঠালৈ লৈ গৈছিল৷ কাতিয়ানৰ মতে, মতিলালে কিশোৰীৰাকীক সেই কোঠাটোত ধৰ্ষণ কৰিছিল আৰু তিনি ঘণ্টাৰ পাছত বাহিৰলৈ লৈ আহিছিল আৰু পাছদিনা তেওঁক পুনৰ উপাসনা কৰিবলৈ কৈছিল। আৰক্ষীয়ে জনোৱা অনুসৰি, মতিলালে কিশোৰীগৰাকীক ধৰ্ষণৰ বিষয়ে কাৰোবাক ক’লে হত্যা কৰাৰ ভাবুকি দিছিল।
কাতিয়ানে কৈছিল যে এই সন্দৰ্ভত ভাৰতীয় দণ্ডবিধিৰ প্ৰাসংগিক ধাৰাৰ অধীনত মতিলালৰ বিৰুদ্ধে এখন এজাহাৰ পঞ্জীয়ন কৰা হৈছে।
কিশোৰীগৰাকীৰ চিকিৎসা পৰীক্ষাত ধৰ্ষণ নিশ্চিত হোৱাৰ পাছত অভিযুক্ত মতিলালক আজি আবেলি কালিঞ্জৰা ম’ৰৰ পৰা তেওঁৰ বাইকৰ সৈতে গ্ৰেপ্তাৰ কৰা হয় আৰু আদালতত এক লিখিত বিবৃতি প্ৰদান কৰে৷ গোচৰটোত আগতীয়া আইনী ব্যৱস্থা লোৱা হৈছে বুলি আৰক্ষী অধীক্ষকগৰাকীয়ে সদৰী কৰে৷
Continue Reading
