ভাৰত-ব্ৰিটেইন কূটনৈতিক সম্পৰ্কত মেলিছে ফাট!

ডিজিটেল ডেস্কঃ লণ্ডনস্থিত ভাৰতীয় দূতাবাসত খালিস্তানীসকলৰ প্ৰতিবাদৰ কিছুদিনৰ পিছতেই নতুন দিল্লীত থকা ব্ৰিটিছ দূতাবাসৰ বাহিৰৰ পৰা বেৰিকেড আঁতৰাই দিয়াৰ সিদ্ধান্ত গ্ৰহণ কৰা হ’ল৷ এজন জ্যেষ্ঠ আৰক্ষী বিষয়াই এটা ৰাষ্ট্ৰীয় সংবাদ মাধ্যমক জনোৱা মতে, "ব্ৰিটিছ উচ্চায়ুক্তৰ বাহিৰত নিৰাপত্তাৰ ব্যৱস্থা অক্ষত অৱস্থাত আছে। অৱশ্যে আয়োগৰ ফালে যোৱা পথত স্থাপন কৰা বেৰিকেডসমূহ আঁতৰাই পেলোৱা হৈছে যিয়ে যাতায়তৰ ক্ষেত্ৰত বাধাৰ সৃষ্টি কৰিছিল।"

 সামাজিক মাধ্যমত খালিস্তান সমৰ্থকসকলৰ প্ৰতিবাদৰ সময়ত লণ্ডনত ভাৰতীয় দূতাবাসৰ ভাৰতৰ পতাকা নমাই দিয়াৰ ভিডিঅ’ প্ৰকাশ পোৱাৰ পিছতে দেওবাৰে নিশা ব্ৰিটিছ উপ-উচ্চায়ুক্তক চমন কৰি সম্পূৰ্ণ “নিৰাপত্তাৰ অনুপস্থিতি”ৰ বিষয়ে ব্যাখ্যাৰ দাবী জনায়।

 ইপিনে ব্ৰিটিছ শীৰ্ষ বিষয়াসকলে কয় যে ব্ৰিটেইন চৰকাৰে ভাৰতীয় উচ্চায়ুক্তৰ নিৰাপত্তাক “গুৰুতৰভাৱে” ল’ব, কিয়নো ব্ৰিটিছ কৰ্তৃপক্ষৰ মতে ভাৰতীয় দূতাবাসত বিচ্ছিন্নতাবাদী খালিস্তানী পতাকা উৰুৱাই প্ৰতিবাদকাৰীৰ এটা দলে কৰা কাৰ্য্যক “লজ্জাজনক” আৰু “অগ্ৰহণযোগ্য” বুলি গৰিহণা দিছে।