ডিজিটেল ডেস্কঃ পাকিস্তানৰ প্ৰাক্তন অধিনায়ক শ্বাহিদ আফ্ৰিদীয়ে এক বিশেষ আহ্বান জনাইছে ভাৰতৰ প্ৰধানমন্ত্ৰী নৰেন্দ্ৰ মোডীক। আফ্ৰিদীয়ে কয় যে ভাৰতীয় ক্ৰিকেট ব’ৰ্ড অতি শক্তিশালী ক্ৰিকেট ব’ৰ্ড। সেয়ে বিচিচিআইয়ে অধিক দায়িত্ব লৈ ভাৰত আৰু পাকিস্তান দুয়োখন ৰাষ্ট্ৰৰ মাজৰ সম্পৰ্ক স্বাভাৱিক কৰাৰ চেষ্টা কৰিব লাগে।
শ্বাহিদ আফ্ৰিদীয়ে কয় যে ভাৰতৰ প্ৰধানমন্ত্ৰী নৰেন্দ্ৰ মোডীক ভাৰত-পাকিস্তান উভয় ৰাষ্ট্ৰৰ মাজত ক্ৰিকেট অনুষ্ঠিত কৰিবৰ বাবে অনুৰোধ জনাব৷
ডোহাত অনুষ্ঠিত লিজেণ্ডছ লীগ ক্ৰিকেট (এল এল চি)ৰ ধাৰভাষ্য দি থকাৰ সময়ত আফ্ৰিদীয়ে কয় যে, "মই মোডী চাহাবক অনুৰোধ কৰিম যে দুয়োখন দেশৰ মাজত ক্ৰিকেট হ’বলৈ দিয়ক।"
উক্ত অনুষ্ঠানটেই আফ্ৰিদীয়ে কয়- “যদি আমি কাৰোবাৰ লগত বন্ধুত্ব কৰিব বিচাৰো আৰু তেওঁ আমাৰ লগত কথা নাপাতে আমি কি কৰিব পাৰো? বি চি চি আইৰ ব'ৰ্ডৰ মাজত কোনো সন্দেহ নাই, কিন্তু যেতিয়া আপুনি শক্তিশালী হয় তেতিয়া আপোনাৰ দায়িত্ব অধিক হয়। আপুনি আৰু শত্ৰু গঢ়িবলৈ চেষ্টা নকৰে, বন্ধুত্ব গঢ়ি তুলিব লাগিব। যেতিয়া আপুনি অধিক বন্ধুত্ব গঢ়ি তোলে তেতিয়া আপুনি শক্তিশালী হৈ পৰে।"
পাকিস্তান ক্ৰিকেট ব’ৰ্ড দুৰ্বল বুলি বিশ্বাস কৰে নেকি বুলি সংবাদমাধ্যমে সোধা প্ৰশ্নত আফ্ৰিদীয়ে কয় যে, “মই দুৰ্বল বুলি নকওঁ!"
আফ্ৰিদীয়ে অনুভৱ কৰেযে ক্ৰিকেট হৈছে শ্ৰেষ্ঠ কূটনীতি আৰু দুয়োখন দেশৰ ক্ৰিকেট দলে ইজনে সিজনক শক্তিশালী কৰা উচিত। ভাৰতীয় খেলুৱৈসকলৰ সৈতে শ্বাহিদ আফ্ৰিদীৰ আজিও আন্তৰিক সম্পৰ্ক আছে।
শ্বাহিদে কয় যে, "ভাৰতীয় দলত এতিয়াও মোৰ বন্ধু আছে ,যেতিয়া আমি লগ পাওঁ, আলোচনা কৰোঁ, সিদিনা ৰাইনাক লগ পাইছিলো আৰু মই বেট বিচাৰিছিলো, তেওঁ মোক এখন বেট দিছিল।"
২০০৫ চনৰ ছিৰিজৰ সময়ত ভাৰতীয় ক্ৰিকেটাৰ বাহিৰলৈ ওলাই যোৱাৰ সময়ত পাকিস্তানৰ ক্ৰিকেটাৰ সকলৰ পৰা কোনেও ধন লোৱা নাছিল বুলি শ্বাহিদে স্মৰণ কৰে।
কিংবদন্তি বিগ হিটিং অলৰাউণ্ডাৰগৰাকীয়ে কয় যে পাকিস্তানত কোনো নিৰাপত্তাৰ চিন্তা নাই কাৰণ শেহতীয়াকৈ বহু আন্তঃৰাষ্ট্ৰীয় দলে নিৰাপদে পাকিস্তান ভ্ৰমণ কৰিছে।
আফ্ৰিদীয়ে কয় যে,২০০৮ চনৰ মুম্বাইৰ সন্ত্ৰাসবাদী আক্ৰমণৰ পিছত দুয়োখন দেশৰ মাজত দ্বিপাক্ষিক ক্ৰিকেট সম্পৰ্ক পুনৰ আৰম্ভ হোৱা নাই; ২০০৮ৰ পিছত দলসমূহে আন্তৰ্জাতিক প্ৰতিযোগিতাতহে মুখামুখি হৈছে। আফ্ৰিদীয়ে কয় যে দুয়োখন ব’ৰ্ডৰ মাজত নিয়মীয়াকৈ আলোচনা হ’ব লাগে।
২০২২ চনত এছিয়ান ক্ৰিকেট কাউন্সিলৰ মুৰব্বী তথা বিচিচিআইৰ সম্পাদক জয় শ্বাহে ৰাজহুৱা কৰিছিল যে ভাৰতীয় দলটোৱে এছিয়া কাপত খেলিবলৈ পাকিস্তানলৈ নাযায় আৰু প্ৰতিযোগিতাখন নিৰপেক্ষ স্থানত অনুষ্ঠিত হ’ব লাগিব। পিচিবিয়ে এই কথাত আপত্তি কৰি কয় যে এচিচিয়ে পাকিস্তানত হ’বলগীয়া প্ৰতিযোগিতাখন পাকিস্তানৰ পৰা আঁতৰি যোৱাৰ বিষয়েও অজ্ঞ আছিল আৰু পাকিস্তানৰ পৰামৰ্শ অবিহনেই সিদ্ধান্ত লোৱা হৈছিল। তেতিয়াৰ পৰাই পিচিবিয়ে ভাৰতত অনুষ্ঠিত হ’বলগীয়া ৫০ অভাৰৰ বিশ্বকাপৰ পৰা আঁতৰি আহিব বুলি ভাবুকি দি আহিছে, যদিহে এছিয়া কাপ ক্ৰিকেট জগতৰ আন কোনো ঠাইত খেলা হয়।
আফ্ৰিদীয়ে কয় যে “আচল কথাটো হ’ল আমি কেতিয়াও ইজনে -সিজনৰ লগত বিষয়বিলাক আলোচনা নকৰোঁ। যোগাযোগ আটাইতকৈ গুৰুত্বপূৰ্ণ। ৰাজনীতিবিদসকলেও একে কাম কৰে, আলোচনা কৰে। যেতিয়ালৈকে আপোনালোকে নিজৰ মাজত বহি থাকিব তেতিয়ালৈকে একো সমাধান নহ’ব। ভাৰত পাকিস্তানলৈ অহা হ’লে ভাল হ’লহেঁতেন৷ আমি আৰু আমাৰ চৰকাৰে ইজনে সিজনৰ সৈতে উন্নত সম্পৰ্ক বিচাৰো।’’
Continue Reading
