ডিজিটেল ডেস্কঃ টুইটাৰৰ নতুন মালিক এলন মাস্কে ভাৰতীয় গোটৰ সকলো কৰ্মচাৰীকে চাকৰিৰ পৰা বৰ্খাস্ত কৰিছে। সূত্ৰ অনুসৰি কোম্পানীটোৰ ভাৰতত প্ৰায় ২৫০ জন কৰ্মচাৰী আছিল। কোম্পানীটোৱে কৰ্মচাৰীসকললৈ মেইল প্ৰেৰণ কৰিছিল যে শুকুৰবাৰে চাকৰিৰ পৰা বৰ্খাস্ত কৰা হ’ব। সেই অনুসৰি ভাৰতত কৰ্মচাৰীৰ বৰ্খাস্ত আৰম্ভ কৰা হৈছে। শেহতীয়াকৈ এলন মাস্কে টুইটাৰ ক্ৰয় কৰিছে।
মাস্ক টুইটাৰৰ মালিক হোৱাৰ লগে লগে মাস্কে প্ৰথমে ভাৰতীয় মূলৰ চিইঅ’ পৰাগ আগৰৱালাকে ধৰি কোম্পানীটোৰ চাৰিজন ডাঙৰ কাৰ্যবাহী বিষয়াক চাকৰিৰ পৰা বৰ্খাস্ত কৰে। ইয়াৰ পিছত টুইটাৰত চাটাই আৰম্ভ হ’ব বুলি ভবা হৈছিল।
টুইটাৰে কৰ্মচাৰীসকললৈ প্ৰেৰণ কৰা মেইলত কোৱা হৈছিল যে টুইটাৰক সুস্থ পথত লৈ যাবলৈ আমি শুকুৰবাৰে বিশ্বব্যাপী কৰ্মশক্তি হ্ৰাস কৰাৰ কঠিন প্ৰক্ৰিয়াৰ মাজেৰে যাম। ভাৰতৰ প্ৰায় সমগ্ৰ কৰ্মচাৰীক চাকৰিৰ পৰা বৰ্খাস্ত কৰা হৈছে। সমগ্ৰ কিউৰেচন দলটোক চাকৰিৰ পৰা বৰ্খাস্ত কৰা হৈছে।
এই দলটোৱে টুইটাৰ মমেণ্টছ বৈশিষ্ট্যৰ বাবে কণ্টেণ্ট তৈয়াৰ কৰিছিল। ইয়াৰ উপৰিও যোগাযোগ, বিশ্বব্যাপী কণ্টেণ্ট অংশীদাৰিত্ব, বিক্ৰী আৰু বিজ্ঞাপনৰ ৰাজহ, অভিযান্ত্ৰিক আৰু প্ৰডাক্ট দলসমূহকো লক্ষ্য কৰি লোৱা হৈছে।
এক সূত্ৰই জনোৱা মতে, এই দলসমূহৰ সম্পূৰ্ণ বা ৫০ শতাংশ কৰ্মচাৰীক চাকৰিৰ পৰা বৰ্খাস্ত কৰা হৈছে। টুইটাৰৰ পৰা বৰ্খাস্ত কৰা এজন কৰ্মচাৰীয়ে কয় যে ঠিকাভিত্তিক কৰ্মচাৰীৰ কিছুমানক ধৰি ৰখা হৈছে। ২০২১ চনৰ ডিচেম্বৰ মাহত টুইটাৰত বিশ্বজুৰি ৭৫০০ কৰ্মচাৰী আছিল।
Continue Reading
