ভাৰতীয় অৰ্থনীতিলৈ সুখবৰ! প্ৰায়বোৰ দেশতে অৰ্থনৈতিক মন্দাৱস্থা চলি থকাৰ বিপৰীতে সংকটমুক্ত ভাৰত মুদ্ৰাস্ফীতিও হ্ৰাস পোৱাৰ সম্ভাৱনা

ডিজিটেল ডেস্কঃ জনজীৱনলৈ আতংক কঢ়িয়াই অনাৰ সমান্তৰালভাৱে বিশ্ব অৰ্থনীতিলৈয়ো বিপদ কঢ়িয়াই আনিছিল ক’ভিড মহামাৰীয়ে৷ক’ভিডে মন্দাৱস্থাৰো সৃষ্টি কৰিছিল বহু দেশত৷হঠাৎ সৃষ্টি হোৱা আৰ্থিক সংকটৰ সৈতে এতিয়াও বহু দেশে এতিয়াও যুঁজি আছে৷

শেহতীয়াকৈ ২০২৩ বৰ্ষতো বিশ্ব অৰ্থনীতিৰ এই মন্দাৱস্থা বাহাল থাকিব বুলি এক প্ৰতিবেদনত স্পষ্ট কৰিছে আন্তজাৰ্তিক মুদ্ৰা নিধিয়ে৷ একেখন প্ৰতিবেদনত মুদ্ৰানিধিয়ে ইয়াকো স্পষ্ট কৰিছে যে, ২০২৩ বৰ্ষত সমগ্ৰ বিশ্বৰে অৰ্থনীতি কিছু অস্থিৰ হৈ উঠিব৷ কিন্তু ইয়াৰ বিপৰীতে  যথেষ্ট সবল হৈ থাকিব ভাৰতৰ অৰ্থনীতিৰ ভেটি৷

আইএমএফৰ মতে, ভাৰতৰ মুঠ ঘৰুৱা উৎপাদন বৃদ্ধিৰ হাৰ হৈছে - ৬.৮ শতাংশ৷ ২০২৩-২৪ বৰ্ষতো এই হাৰ ৬.১ শতাংশত আৱদ্ধ হোৱাৰ সম্ভাৱনা আছে৷

সমান্তৰালভাৱে আইএমএফৰ প্ৰতিবেদনত উল্লেখ আছে যে বিশ্বৰ অন্যান্য দেশৰ লগতে মাৰ্কিন অৰ্থনীতিতো মন্দাৱস্থাই দেখা দিয়াৰ সম্ভাৱনা আছে৷

তথ্য অনুসৰি , ক’ভিড সংক্ৰমণৰ ব্যাপক ক্ষতিৰ পিছতো ভাৰতৰ অৰ্থনীতি ক্ৰমে সবল হ’বলৈ ধৰিছে৷ বাস্তৱত ভাৰতৰ জিডিপিৰ হাৰ ৮.৭ শতাংশ৷ চলিত বিত্তীয় বৰ্ষতো বৃদ্ধিৰ হাৰ অব্যাহত আছে ভাৰতীয় অৰ্থীনীতিৰ৷

দেশৰ ২০২২-২৩ বিত্তীয় বৰ্ষত মুদ্ৰাস্ফীতিৰ হাৰ ৬.৯ শতাংশত আৱদ্ধ থাকিব৷ অৱশে্য ইয়াৰ পিছত ভাৰতত মুদ্ৰাস্ফীতিৰ হাৰ হ্ৰাস পোৱাৰ সম্ভাৱনা আছে বুলিও কোৱা হৈছে আইএমএফৰ প্ৰতিবেদনত৷