ডিজিটেল ডেস্কঃমৃত্যুৰ দুৱাৰদলিৰ পৰা উভতি আহিবলৈ সক্ষম হৈছে ইৰাকৰ এজন নাগৰিক। ইৰাকত কৰ্কট ৰোগত আক্ৰান্ত এজন ব্যক্তি (চতুৰ্থ পৰ্যায়)য়ে ভাৰতলৈ চিকিৎসা কৰোৱাবলৈ আহিছিল। তেওঁৰ জীয়াই থকাৰ আশা তেনেই ক্ষীণ আছিল। কিন্তু ভাৰতীয় চিকিৎসকৰ প্ৰচেষ্টাত তেওঁ নতুন জীৱন লাভ কৰিছে। দ্বাৰকাৰ মণিপাল চিকিৎসালয়ৰ চিকিৎসকসকলে এক জটিল অস্ত্ৰোপচাৰৰ জৰিয়তে ৪৭ বছৰীয়া ইৰাকী ব্যক্তিজনৰ জীৱন ৰক্ষা কৰিছে। এই ঘটনাটোৱে আকৌ এবাৰ এটা বাৰ্তা প্ৰেৰণ কৰিছে যে কৰ্কট ৰোগৰ অৰ্থ মৃত্যু নহয়। সঠিক চিকিৎসাই অসম্ভৱকো সম্ভৱ কৰি তুলিব পাৰে।
চিকিৎসকসকলৰ মতে লোকজনে প্ৰথমতে ইৰাকত চিকিৎসাধীন হৈ আছিল। তেওঁ মলাশয়ৰ কৰ্কট ৰোগত আক্ৰান্ত হৈছিল। পিছত তেওঁ ভাৰতলৈ আহিছিল আৰু দ্বাৰকাৰ মণিপাল চিকিৎসালয়ত চিকিৎসা আৰম্ভ কৰিছিল। তেওঁক কেমো থেৰাপী আৰু ৰে দিয়া হৈছিল।
মণিপাল চিকিৎসালয়ৰ অস্ত্ৰোপচাৰ অংক'লজী বিভাগৰ মুৰব্বী ডাঃ সঞ্জীৱ কুমাৰে কয়, "ৰোগীগৰাকীয়ে কৰ্কট ৰোগত আক্ৰান্ত বুলি শুনি জীৱনৰ আশা প্ৰায় ত্যাগ কৰিছিল। তেওঁৰ আত্মবিশ্বাস নাছিল যে তেওঁ জীয়াই থাকিব পাৰিব। এয়া আমাৰ বাবেও এটা অতি কঠিন যুঁজ আছিল। প্ৰথমতে, ৰোগীজনত ভুল চিকিৎসা কৰা হৈছিল। তদুপৰি, তেওঁৰ ওজন আছিল ১২২ কিলোগ্ৰাম। কৰ্কট ৰোগৰ উপৰি তেওঁৰ শৰীৰত আন বহু ৰোগ আছিল। '
চিকিৎসকসকলে দাবী কৰে যে সাধাৰণতে কৰ্কট ৰোগৰ চতুৰ্থ পৰ্যায়টো মৃত্যুৰ সমান। তথাপিও চিকিৎসাৰ কিছু সুযোগ আছিল। চিকিৎসাৰ জটিলতাৰ কথা মনত ৰাখি, চিকিৎসকসকলে এক বিশেষ উপায়েৰে চিকিৎসা কৰাৰ সিদ্ধান্ত লৈছিল । সেই অনুসৰি অস্ত্ৰোপচাৰৰ জৰিয়তে কৰ্কট ৰোগৰ টিউমাৰ আঁতৰ কৰাৰ সিদ্ধান্ত লোৱা হৈছিল। ইয়াৰ উপৰি কেমোথেৰাপীৰ প্ৰক্ৰিয়া অব্যাহত ৰখা হৈছিল । সফল অস্ত্ৰোপচাৰৰ পিছত ব্যক্তিজন এতিয়া সম্পূৰ্ণভাবে সুস্থ। এই ঘটনাই প্ৰমাণ কৰিছে যে উন্নত চিকিৎসাৰ দ্বাৰা কৰ্কট ৰোগৰ দৰে জটিল ৰোগ আৰোগ্য কৰিব পাৰি।
Continue Reading
