ডিজিটেল ডেস্ক: ৭৫সংখ্যক গণৰাজ্য দিৱসৰ পূৰ্বসন্ধ্যা দেশবাসীক সম্বোধন কৰে ৰাষ্ট্ৰপতি দ্ৰৌপদী মুৰ্মুৱে৷ গণৰাজ্য দিৱসৰ প্ৰাকমুহূৰ্তত দেশবাসীক সম্বোধন কৰি ৰাষ্ট্ৰপতিগৰাকীয়ে কয় যে ভাৰত সঁচাকৈয়ে গণতন্ত্ৰৰ মাতৃ৷ তেওঁ কয়, ভাৰতত গণতান্ত্ৰিক ব্যৱস্থা পশ্চিমীয়া গণতন্ত্ৰৰ ধাৰণাতকৈ বহু পুৰণি। সেইকাৰণেই ভাৰতক গণতন্ত্ৰৰ মাতৃ বুলি কোৱা হয়৷
ৰাষ্ট্ৰপতিগৰাকীয়ে লগতে কয় যে ভাৰত অমৃতকালৰ প্ৰাৰম্ভিক বছৰত আছে আৰু দেশবাসীয়ে ভাৰতক নতুন উচ্চতালৈ লৈ যোৱাৰ সোণালী সুযোগ লাভ কৰিছে। এয়া হৈছে পৰিৱৰ্তনৰ সময়। আমাৰ লক্ষ্যপ্ৰাপ্ত কৰাৰ বাবে প্ৰতিজন নাগৰিকৰ অৱদান গুৰুত্বপূৰ্ণ হ’ব৷
দেশক উদ্দেশ্যি কৰা সম্বোধনত ৰাষ্ট্ৰপতিগৰাকীয়ে কৃত্ৰিম বুদ্ধিমত্তা আৰু যন্ত্ৰ শিক্ষণ প্ৰক্ৰিয়া কেনেকৈ আমাৰ জীৱনৰ অংশ হৈ পৰিছে সেই বিষয়েও উল্লেখ কৰে৷
তেওঁ লগতে কয়, অমৃত কালৰ সময়ছোৱা অভূতপূৰ্ব প্ৰযুক্তিগত পৰিৱৰ্তনৰ সময় হ’ব। ভৱিষ্যতে চিন্তাৰ বহুতো ক্ষেত্ৰ আছে, কিন্তু আগলৈ বিশেষকৈ যুৱসকলৰ বাবে ৰোমাঞ্চকৰ সুযোগো আছে৷ তেওঁলোকে নতুন সীমাৰ অন্বেষণ কৰি আছে। আমি তেওঁলোকৰ পথৰ পৰা বাধা আঁতৰাবলৈ আৰু তেওঁলোকক তেওঁলোকৰ সম্পূৰ্ণ সম্ভাৱনা উলিয়াবলৈ দিবলৈ যিমান পাৰো কৰিব লাগিব৷
ৰাষ্ট্ৰপতিগৰাকীয়ে লগতে কয়, মই বিশ্বাস কৰোঁ যে ‘নাৰী শক্তি বন্দন অধিনিয়ম’ নাৰী সবলীকৰণৰ বৈপ্লৱিক আধাৰ হিচাপে প্ৰমাণিত হ’ব৷ আনহাতে, ৰাম মন্দিৰৰ প্ৰসংগ উল্লেখ কৰি ৰাষ্ট্ৰপতিগৰাকীয়ে ভৱিষ্যতৰ ইতিহাসবিদসকলে ৰাম মন্দিৰক ভাৰতীয় সভ্যতাৰ ঐতিহ্যৰ পুনৰাৱিষ্কাৰৰ গুৰুত্বপূৰ্ণ স্থান হিচাপে বিবেচনা কৰিব বুলি মন্তব্য কৰে৷
Continue Reading
