ডিজিটেল ডেস্কঃ পাকিস্তানৰ বৈদেশিক মন্ত্ৰী বিলাৱল ভুট্টো জৰ্দাৰীয়ে কৰিব ভাৰত ভ্ৰমণ। অহা মাহত গোৱাত অনুষ্ঠিত হ’ব ছাংহাই সহযোগিতা সংস্থাৰ অন্তৰ্গত আঠখন দেশৰ বৈদেশিক মন্ত্ৰীৰ বৈঠক। এই বৈঠকতে উপস্থিত থাকিব পাক বৈদেশিক মন্ত্ৰী বিলাৱল ভুট্টো জৰ্দাৰী। ৪-৫ মে’ত গোৱাত অনুষ্ঠিত হ’ব এই বৈঠক।
উল্লেখ্য যে ইয়াৰ পূৰ্বে ২০১৪ চনত পাকিস্তানী নেতা নৱাজ শ্বৰীফে ভাৰত ভ্ৰমণ কৰিছিল। সুদীৰ্ঘ কালৰ পাছত এইবাৰ ভাৰতলৈ আহিবলৈ সাজু হৈছে বিলাৱল ভুট্টো জৰ্দাৰী।
পাকিস্তানৰ বৈদেশিক পৰিক্ৰমা মন্ত্ৰালয়ে সদৰী কৰা তথ্য অনুসৰি পাকিস্তানৰ প্ৰতিনিধি দলটোৰ নেতৃত্ব দিব বিলাৱল ভুট্টো জৰ্দাৰীয়ে। এই বৈঠকৰ সভাপতিত্ব কৰিব ভাৰতে। জানুৱাৰী মাহত চীন আৰু পাকিস্তানৰ বৈদেশিক মন্ত্ৰীসকলক বৈদেশিক পৰিক্ৰমা মন্ত্ৰালয়ে আমন্ত্ৰণ জনাইছিল।
উল্লেখ্য যে ২০১৯ চনত পুলৱামা সন্ত্ৰাসবাদী আক্ৰমণৰ পাছৰে পৰা ভাৰত-পাক সম্পৰ্কৰ বহু অৱনতি ঘটিছে। এই সম্পৰ্ক ইমানেই অৱনতি ঘটিল যে পাকিস্তানৰ শিল্পীসকলে ভাৰতত কৰা কামবোৰো নিষিদ্ধ কৰা হ'ল। এনে পৰিস্থিতিত বিলাৱল ভুট্টো জৰ্দাৰীৰ ভাৰত ভ্ৰমণ যথেষ্ট তাৎপৰ্যপূৰ্ণ বিষয় হিচাপে বিবেচিত হৈছে।
Continue Reading
