ডিজিটেল ডেস্ক: অসমৰ সংবাদ জগতৰ পুৰোধা ব্যক্তি পদ্মশ্ৰী প্ৰফুল্ল গোবিন্দ বৰুৱা(পি জি বৰুৱা)ৰ দেহাৱসান। পি জি বৰুৱাৰ বিয়োগত মৰ্মাহত ৰাজ্যবাসী।
হাউলি পৰিল সংবাদ জগতৰ বটবৃক্ষস্বৰূপ ব্যক্তিত্ব। মহীৰূহ, স্বপ্নদ্ৰষ্টা প্ৰফুল্ল গোবিন্দ বৰুৱাৰ বিয়োগে বিশাল শূন্যতাৰ সৃষ্টি কৰিলে সংবাদ জগতত।
৯৩ বছৰ বয়সত শেষ নিঃশ্বাস ত্যাগ পি জি বৰুৱাৰ। গুৱাহাটীৰ এখন বেচৰকাৰী হাস্পতালত মৃত্যুক সাবটি লয় বৰুৱাই।
১৯৩২ চনৰ ২৬ জুলাইত ডিব্ৰুগড়ত জন্ম বৰুৱাৰ। ১৯৪৯ত প্ৰথম বিভাগ, দুটা বিষয়ত লেটাৰসহ মেট্ৰিক উত্তীৰ্ণ। ডিব্ৰুগড়তে স্কুলীয়া শিক্ষা সাং কৰিছিল পি জি বৰুৱাই। ১৯৫১ত কটন কলেজৰ পৰা ISC পৰীক্ষাত উত্তীৰ্ণ। কলকাতাৰ প্ৰেছিডেন্সী কলেজৰ পৰা অৰ্থনীতিত অনাৰ্ছসহ স্নাতক। ১৯৫৭ত কলকাতা বিশ্ববিদ্যালয়ৰ পৰা LLBত স্বৰ্ণ পদকপ্ৰাপ্ত আছিল বৰুৱা।
১৯৬২ চনত বাতৰি কাকত উদ্যোগত বৰুৱাই আৰম্ভ কৰে কৰ্মজীৱন। ৪ বছৰ পাছতে ১৯৬৬ত ট্ৰিবিউন গ্ৰুপৰ পৰিচালন সঞ্চালকৰ দায়িত্ব লয় বৰুৱাই। ১৯৬৪ত সাংবাদিকতা আৰু ছপা উদ্যোগৰ বিষয়ে অধ্যয়নৰ বাবে UKৰ থমছন ফাউণ্ডেশ্বনৰ পৰা পাইছিল জলপানি। সংবাদক্ষেত্ৰলৈ আগবঢ়োৱা অৱদানৰ বাবে কেন্দ্ৰীয় চৰকাৰে পি জি বৰুৱাক সন্মানিত কৰিছিল পদ্মশ্ৰী সন্মানেৰে। তেওঁৰ পিতৃ সিংহপুৰুষ ৰাধা গোবিন্দ বৰুৱাই ১৯৩৯ত প্ৰতিষ্ঠা কৰিছিল ‘আছাম ট্ৰিবিউন’। ১৯৬৬ত ট্ৰিবিউন গ্ৰুপৰ পৰিচালন সঞ্চালকৰ দায়িত্ব গ্ৰহণ বৰুৱাৰ। মৃত্যুৰ সময়লৈকে ট্ৰিবিউন গ্ৰুপৰ অধ্যক্ষ পদত আছিল পি জি বৰুৱা।
পি জি বৰুৱাৰ বিয়োগত মুখ্যমন্ত্ৰী হিমন্ত বিশ্ব শৰ্মাৰ শোক প্ৰকাশ। প্ৰধানমন্ত্ৰী মোদীয়েও শোক প্ৰকাশ কৰিছে পি জি বৰুৱাৰ বিয়োগত। মোদীয়ে সামাজিক মাধ্যমত শোক প্ৰকাশ কৰি কয় ‘‘দ্য আছাম ট্ৰিবিউন গ্ৰুপৰ সম্পাদক তথা পৰিচালন সঞ্চালক শ্ৰী পি জি বৰুৱা দেৱৰ বিয়োগত মৰ্মাহত হৈছো। সংবাদ মাধ্যমৰ জগতখনলৈ আগবঢ়োৱা অৱদানৰ বাবে তেওঁ স্মৰণীয় হৈ ৰ’ব। অসমৰ প্ৰগতিক আগুৱাই নিয়াৰ লগতে ৰাজ্যৰ সংস্কৃতিক জনপ্ৰিয় কৰি তোলাৰ প্ৰতিও তেওঁ উৎসাহী আছিল। তেওঁৰ পৰিয়াল আৰু গুণমুগ্ধসকলৰ প্ৰতি মোৰ সমবেদনা জনাইছো। ঔম শান্তি।’’
Continue Reading
