ডিজিটেল ডেস্ক: ৰাজস্থানৰ উদয়পুৰত অনুষ্ঠিত ভাৰতীয় জাতীয় কংগ্ৰেছৰ নৱ সংকল্প শিবিৰত অংশ লৈ পুনৰ সংবাদ শিৰোনাম দখল কৰিছে জ্যেষ্ঠ কংগ্ৰেছ নেতা তথা লোকসভাৰ সাংসদ শশী থাৰুৰ৷ কংগ্ৰেছ নেতা শশী থাৰুৰে আজি কয় যে চিন্তন শিবিৰত দল আৰু দেশে সন্মুখীন হোৱা গুৰুত্বপূৰ্ণ প্ৰত্যাহ্বানসমূহৰ বাবে গঠন কৰা ৰাজনৈতিক সমিতিৰ আলোচনাত সৌহাৰ্দ্যপূৰ্ণ সমাধান পোৱা গৈছে৷
থাৰুৰে লগতে কয় যে নৱ সংকল্প চিন্তান শিবিৰ হৈছে এম পল্লম ৰাজু আৰু মণি শংকৰ আয়াৰকে ধৰি সমগ্ৰ দেশৰ দলীয় সহকৰ্মীসকলৰ সৈতে যোগাযোগ কৰাৰ এক উৎকৃষ্ট সুযোগ। দলৰ মুৰব্বী ছোনিয়া গান্ধীয়ে এই বিষয়ত আলোচনাৰ নেতৃত্ব দিবলৈ গঠন কৰা ৰাজনৈতিক সমিতিৰ কিছু সদস্যৰ সৈতে এখন আলোকচিত্ৰ পোষ্ট কৰি থাৰুৰে লগতে কয় যে শনিবাৰে নিশা স্থগিত কৰা আলোচনাৰ পিছত তেওঁলোকে এটা গ্ৰুপফটোৰ বাবে একত্ৰিত হৈছিল। ২০২০ত গান্ধীলৈ বৃহৎ সংস্কাৰ বিচাৰি লিখা জি-২৩ গোটৰ অন্যতম নেতা, তিৰুৱন্তপুৰমৰ সাংসদগৰাকীয়ে কয়, আলোচনাবোৰ কাৰ্যত: আভ্যন্তৰীণ দলীয় গণতন্ত্ৰৰ এক শক্তিশালী উদাহৰণ আছিল৷ ইয়াত আৱেগিকভাৱে বিতৰ্কিত আৰু সৌহাৰ্দ্যপূৰ্ণ সমাধান পোৱা গৈছে৷
তেওঁ মহিলা কংগ্ৰেছৰ কেইগৰাকীমান সদস্যৰ সৈতে এখন ফটো টুইট কৰি লিখিছে, নৱ সংকল্প শিবিৰত মহিলা কংগ্ৰেছৰ প্ৰতিনিধিসকলৰ এটা গ্ৰুপ চেলফিত যোগদান কৰিবলৈ আমন্ত্ৰণ জনোৱা হৈছিল। থাৰুৰ ৰাজনীতি সমিতিৰ এজন সদস্য যাৰ আহ্বায়ক ৰাজ্যসভাৰ বিৰোধী দলৰ নেতা মল্লিকাৰ্জুন খাৰ্গে। শুকুৰবাৰে আৰম্ভ হোৱা ‘চিন্তন শিবিৰ’ আজি সামৰণি পৰিব৷ আজি অনুষ্ঠিত হ’বলগীয়া কংগ্ৰেছ ৱৰ্কিং কমিটিৰ বৈঠকত ঘোষণাপত্ৰৰ এখন খচৰা আলোচনা কৰা হ’ব।
