ভেটিৰক্ষাৰ অন্তিম যুঁজত অগপ: বিজেপিক সকলো এৰি দিলে নেকি অতুল-কেশৱে ?

ডিজিটেল ডেস্ক: অসমবাসীৰ আলফুল হেঁপাহত গঠন হৈছিল দলটো৷ জাতীয়তাবাদী চিন্তা-চেতনা আৰু আঞ্চলিকতাবাদী ভাবধাৰাৰে পৰিচালিত হৈছিল দলটোৰ নীতি-আদৰ্শ৷ দলটো ‘অসম গণ পৰিষদ’৷ অসমৰ এটি আঞ্চলিক ৰাজনৈতিক দল৷ অসমত দুবাৰকৈ চৰকাৰ গঠন কৰা দলটো এতিয়া জীয়াই আছে বিজেপিৰ অক্সিজেন গ্ৰহণ কৰি৷ কৌশলী ৰাজনীতিৰে দিল্লী-দিছপুৰত ক্ষমতাত থকা ৰাষ্ট্ৰীয় ৰাজনৈতিক দল ‘ভাৰতীয় জনতা পাৰ্টী’ৰ আগ্ৰাসনে অগপৰ আঞ্চলিকতাবাদী ভাবধাৰাক সংকুচিত কৰি একপ্ৰকাৰ বিজেপিৰ বহতীয়াত পৰিণত কৰিছে৷ ২০১৬ চনত দ্বিতীয়বাৰৰ বাবে অসম গণ পৰিষদে বিজেপিৰ সৈতে মিত্ৰতা স্থাপন কৰে৷ তেতিয়াৰে পৰা প্ৰতিটো নিৰ্বাচনতে বিজেপিয়ে অসম গণ পৰিষদ দলটোক গ্ৰাস কৰি আহিছে৷ মূলত: ৰাষ্ট্ৰীয় দলৰ উদ্দেশ্যই হৈছে আঞ্চলিক শক্তিবোৰক শক্তিহীন কৰি তোলা৷ যাতে ৰাষ্ট্ৰীয় ৰাজনীতিৰ ডাল-পাত-পোখা বিয়পি পৰিব পাৰে সৰ্বত্ৰে৷ তাৰেই আখৰা চলিছে অসমত৷ অসম গণ পৰিষদৰে মিত্ৰতা স্থাপন কৰি দুবাৰকৈ চৰকাৰ গঠন কৰা বিজেপিয়ে এতিয়া অসমৰ ৰাজনৈতিক প্ৰেক্ষাপটত গুৰুত্বহীন কৰি তুলিছে অসম গণ পৰিষদক৷ বিজেপিৰে মিত্ৰতা স্থাপনৰ পাছত অসমৰ ৰাইজৰ সমালোচনাৰ সন্মুখীন হৈছিল অসম গণ পৰিষদ৷ শ্বহীদৰ ত্যাগ আৰু সংগ্ৰামৰ পৃষ্ঠভূমিত গঠিত দলটোৱে নিজৰ জাতীয়তাবাদী ভাবধাৰা বিসৰ্জন দি ৰাষ্ট্ৰীয় ৰাজনৈতিক দলৰ হাতোৰাত আবদ্ধ হৈ পৰাৰ পাছৰে পৰা দলটো আজিকোপতি মুক্ত হ’ব পৰা নাই৷ পৰিস্থিতি এনে পৰ্যায় পাইছেগৈ, বিজেপিৰ মিত্ৰজোঁটত থকা বাবে দলটোৱে কোনো দলীয় সিদ্ধান্তও এককভাৱে গ্ৰহণ কৰিব নোৱাৰে৷ দলটোৰ সভাপতি অতুল বৰা আৰু কাৰ্যকৰী সভাপতি কেশৱ মহন্ত মন্ত্ৰী হিচাপে চৰকাৰত কাৰ্যনিৰ্বাহ কৰি থকাটোৱেই যেন দলটোৰ সৰ্বোচ্চ কৃতিত্ব৷ সমাগত পৌৰনিৰ্বাচনতো আমবাৰীৰ নেতৃত্বই নিৰ্লজ্জ আত্মসমৰ্পণ কৰিলে বিজেপিৰ ওচৰত৷ জাতীয় অভিৱৰ্তনেৰে গোলাঘাটত জন্মগ্ৰহণ কৰা দলটোৱে পৌৰ নিৰ্বাচনত গোলাঘাট জিলাৰ ৫৩খন আসনৰ ভিতৰত ১৬খন আসনতহে প্ৰতিদ্বন্দ্বিতা কৰিবলৈ সুযোগ পাইছে৷ তিনিচুকীয়া, ডিব্ৰুগড় জিলাৰ ১১৭টা ৱাৰ্ডৰ ২৩টাহে আঞ্চলিক দলটোৱে লাভ কৰিছে৷ একেদৰে, তেজপুৰৰ ১৯টা ৱাৰ্ডৰ ৩টাহে পৰিল অগপৰ হাতত, নলবাৰীৰ ১৭টা ৱাৰ্ডৰ দুটাহে অগপক৷ একেই পৰিস্থিতি অসমৰ প্ৰান্তে প্ৰান্তে৷ বিজেপিৰ দয়া আৰু অনুগ্ৰহতহে এতিয়া অগপৰ ৰাজনৈতিক গ্ৰাফৰ উঠা-নমা নিৰ্ভৰ কৰিছে৷ উল্লেখ্য যে, ‘কা’ আন্দোলনৰ সময়তো দলটোৰ স্ববিৰোধী চৰিত্ৰই দলটোক ৰাইজৰ মাজৰ পৰা দূৰলৈ ঠেলিছিল৷