ডিজিটেল ডেস্কঃ ভিক্ষাৰীসকলে হাত পাতে। আনৰ ওপৰত নিৰ্ভৰ কৰি জীয়াই থাকে। কিন্তু এনে এগৰাকী ভিক্ষাৰীয়েই এক লাখ টকা দান কৰিছে উৰিষ্যাৰ জগন্নাথ মন্দিৰত। তাৰপাছতে তীব্ৰ চৰ্চা চলিছে ভিক্ষাৰীগৰাকীক লৈ। ঘটনাটোত অবাক হৈ পৰে জগন্নাথ মন্দিৰ কমিটি।
টুলু বেহেৰা নামৰ এই মহিলা ভিক্ষাৰীগৰাকী বিগত কুৰি বছৰ ধৰি বিখ্যাত জগন্নাথ মন্দিৰত ভিক্ষাবৃত্তি কৰি আহিছে। ভিক্ষা কৰিয়েই জীৱন পাৰ কৰিছে। কিন্তু এতিয়া বয়স হৈছে। সেয়ে ভীক্ষাৰী জীৱনত সাঁচতীয়া এক লাখ টকা তেওঁ মন্দিৰটোক দান কৰিলে।
কটক চহৰৰ বাসিন্দা টুলুৱে বিবাহপাশত আৱদ্ধ হৈছিল প্ৰফুল্ল বেহেৰাৰ স’তে। কিন্তু বিবাহৰ পাছতে মৃত্যু হয় স্বামীৰ। তাৰপাছতে সম্বলহীন হৈ জগন্নাথ মন্দিৰত ভীক্ষাবৃত্তি আৰম্ভ কৰে টুলুৱে। জগন্নাথ মন্দিৰতে ২০ বছৰ ধৰি তেওঁ ভীক্ষা খুঁজি জীয়াই থাকে।
ভীক্ষা পোৱা টকাৰেই তেওঁ প’ষ্ট অফিচত এক লাখ টকা সঞ্চয় কৰিবলৈ সক্ষম হয়। তাৰপাছতে সিদ্ধান্ত লয় যে সকলো টকা তেওঁ জগন্নাথ মন্দিৰলৈ দান দিব। টুলুৰ যুক্তি হ’ল জীৱনৰ বিয়লী বেলাত উপনীত হৈছে তেওঁ। সেয়ে এইখিনি টকাৰ প্ৰয়োজন নাই।
“মই বাচি থকাৰ বাবে প্ৰভু জগন্নাথৰ ওচৰত ঋণী। মই জীৱনৰ শেষৰ পৰ্যায়ত উপনীত হৈছো। টকাৰে কি কৰিম? সেয়ে সৰ্বশক্তিমানৰ হাতত সপি দিলো।”- সংবাদ মাধ্যমৰ আগত টুলুৱে কয়।
টুলুৱে আগবঢ়োৱা দান গ্ৰহণ কৰিবলৈ প্ৰথমে অমান্তি হৈছিল মন্দিৰ কমিটিয়ে। কিন্তু উপৰ্যুপৰি টুলুৰ অনুৰোধত গ্ৰহণ কৰিবলৈ বাধ্য হয়।
Continue Reading
